नवनियुक्त कार्यकारी निर्देशक शाक्यको दाबी : सरकारले मलाई न्याय गर्यो, घरायसी लोडसेडिङ हुँदैन

द नेप्लिज संवाददाता

१२ चैत २०८१, मङ्गलबार

काठमाडौं– नेपाल विद्युत् प्राधिकरणका नवनियुक्त कार्यकारी निर्देशक हितेन्द्रदेव शाक्यले सरकारले आफूलाई न्याय दिएको बताएका छन् । सोमबार मन्त्रिपरिषद्बाट कार्यकारी निर्देशकमा नियुक्त भएसँगै मंगलबार सञ्चारकर्मीसँग कुराकानी गर्दै उनले आफूलाई अधूरा योजना पूरा गर्ने अवसर मिलेको प्रतिक्रिया दिएका हुन् ।

शाक्यले यसअघि कार्यकारी निर्देशक भएर पनि काम गर्ने अवसर नपाएको उल्लेख गर्दै अब ती योजनाहरू पूरा गर्न आफ्नो ध्यान केन्द्रित हुने बताए । उनले यदि आफूलाई साढे ३ वर्षको कार्यकाल पूरा गर्न दिइएको भए, अहिले देखिएको समस्या नै नआउने दाबी गरे ।

शाक्यले भने, ‘मैंले चार वर्षका लागि नियुक्ति पाएको थिएँ । तर कुलमान घिसिङलाई थप समय दिइयो, जसका कारण म साढे ३ वर्ष मात्र काम गर्न पाइनँ । अदालतले समयमा निर्णय नगर्दा मेरा योजनाहरू अघि बढ्न सकेनन् । सरकारबाट न्याय हुन्छ भन्ने लागेको थियो र सरकारकै निर्णयले त्यो पुष्टि गरेको छ ।’

उनले नियुक्ति पत्र औपचारिक रूपमा नपाए पनि आफ्नो जिम्मेवारी निर्वाह गर्न तयार रहेको बताए । शाक्यले घरायसी ग्राहकलाई लोडसेडिङ नहुने स्पष्ट पारेका छन् । उनले भने, ‘लोडसेडिङ बिजुलीको आपूर्ति पर्याप्त भएमा मात्र हट्छ । अहिले पनि भारतबाट बिजुली आयात गरी व्यवस्थापन गरिएको छ । घरमा लोडसेडिङको समस्या हुँदैन तर उद्योग क्षेत्रमा देखिएको समस्या समाधान गर्न विशेष योजना लागू गरिनेछ ।’

उनका अनुसार औद्योगिक क्षेत्रमा लोडसेडिङको समस्या आगामी एकदेखि डेढ महिनासम्म रहन सक्छ । उनले भने, ‘लोडसेडिङ शून्य बनाउने ग्यारेन्टी गर्न सक्दिन, तर अहिलेको तुलनामा धेरै घटाउने प्रयास हुनेछ । आवश्यक परे २–४ पैसा महँगो तिरेर भए पनि लोडसेडिङ व्यवस्थापन गर्नुपर्ने हुन्छ र मेरो प्रयास त्यही रहनेछ ।’

प्रकाशित : १२ चैत २०८१, मङ्गलबार 13:04