प्रधानमन्त्री ओलीसँग माफी नमाग्दा राज्यमन्त्री तामाङ बर्खास्त

द नेप्लिज संवाददाता

१० वैशाख २०८२, बुधबार

विराटनगर— प्रधानमन्त्री केपी शर्मा ओलीले नेपाल विद्युत प्राधिकरणका तत्कालीन कार्यकारी निर्देशक कुलमान घिसिङलाई समर्थन गर्दै आएका जलस्रोत तथा सिंचाइ राज्यमन्त्री पूर्णबहादुर तामाङ (कान्छाराम)लाई पदबाट बर्खास्त गरेका छन् । प्रधानमन्त्री ओलीले माफी माग्न निर्देशन दिएपनि तामाङले अस्वीकार गरेपछि बर्खास्त गर्ने निर्णयमा पुगेका हुन् ।

प्रधानमन्त्रीले गृहमन्त्री रमेश लेखक र परराष्ट्रमन्त्री आरजू राणा देउवामार्फत तामाङलाई बालुवाटार बोलाई माफी माग्न आग्रह गरेका थिए । तर, आफूले कुनै गल्ती नगरेको दाबी गर्दै तामाङले प्रधानमन्त्रीसँग माफी नमाग्ने अडान राखेका थिए ।

गृहमन्त्रीमार्फत बुधबार साँझ पुनः बालुवाटार आउन भनिए पनि तामाङले अस्वीकार गरेपछि गृहमन्त्रीले राजीनामा दिन सुझाव दिएका थिए । तर तामाङले आफू पार्टी सभापति शेरबहादुर देउवाको सिफारिसमा सरकारमा गएको भन्दै राजीनामा दिन अस्वीकार गरे ।

तामाङको बर्खास्तीको मूल कारण नेपाल विद्युत प्राधिकरणका तत्कालीन कार्यकारी निर्देशक कुलमान घिसिङप्रति उनको समर्थन रहेको बताइएको छ । तामाङले घिसिङलाई हटाउनु नपर्ने अडान राख्दै आएका थिए । यही विषयमा ऊर्जामन्त्री दीपक खड्कासँग तामाङबीच मतभेद चुलिँदो थियो । मन्त्री खड्काले तामाङलाई हटाउन सभापति देउवासँग पटक–पटक आग्रह गरेका थिए ।

कांग्रेसकै अर्का एक मन्त्रीले समेत घिसिङको पक्षमा वकालत गरेको र सचिव सुरेश आचार्यलाई स्पष्टिकरण सोधिएको थियो । प्रधानमन्त्री ओली यस विषयमा असन्तुष्ट रहेको र तामाङलाई एकपटक माफी माग्न आग्रह गरिएको स्रोतले जनाएको छ ।

तामाङले भने आफू बर्खास्त भएको जानकारी बुधबार साँझ ५ बजे गृहमन्त्रीको फोनमार्फत थाहा पाएको बताए । ‘गृहमन्त्रीले राजीनामा माग्नुभयो, मैले पार्टीले पठाएको हुँ, पार्टीले फिर्ता बोलाउनु पर्छ भनेँ,’ तामाङले प्रतिक्रिया दिँदै भने । उनले थपे, ‘बर्खास्त गर्ने प्रधानमन्त्रीको अधिकार हो । तर उनीहरू पनि सधैं पदमा बस्दैनन् । केही महिनाको कुरा हो ।’

यसअघि चैत २८ मा प्रधानमन्त्रीले आगामी आर्थिक वर्षको बजेटबारे छलफल गर्न आयोजना गरेको बैठकमा पनि तामाङले रामेछापका साना आयोजना आवश्यक रहेको विषय उठाएका थिए । प्रधानमन्त्रीले ३ करोडभन्दा कमका योजना नल्याउन निर्देशन दिएपछि उक्त प्रस्तावले पनि ओलीलाई असन्तुष्ट बनाएको स्रोतले जनाएको छ ।

प्रकाशित : १० वैशाख २०८२, बुधबार 23:57