सरकार र शिक्षक महासंघबीच सकारात्मक वार्ता, आन्दोलन अन्त्यको संकेत

द नेप्लिज संवाददाता

१५ वैशाख २०८२, सोमबार

काठमाडौँ — सत्तारुढ दलका शीर्ष नेताहरु र नेपाल शिक्षक महासंघका पदाधिकारीबीच सोमबार भएको वार्ता सकारात्मक दिशातर्फ उन्मुख भएको छ। करिब तीन घण्टा लामो छलफलमा महासंघले उठाएका मागहरू सम्बोधन गर्ने विषयमा सरकार सकारात्मक रूपमा प्रस्तुत भएपछि २७ दिनदेखि जारी शिक्षकहरूको आन्दोलन टुंगिने सम्भावना देखिएको हो।

वार्तामा सहभागी एक नेताका अनुसार तत्कालीन शिक्षामन्त्री विद्या भट्टराईले गृहकार्य गरेर तयार पारेको सात बुँदे प्रस्तावलाई आधार मानेर सहमति जुटाउने प्रयास भएको छ। सत्तारुढ दल र महासंघका पदाधिकारीबीच कांग्रेसका उपसभापति पूर्णबहादुर खड्काको निवासमा बैठक बसेको थियो। उक्त बैठक लगत्तै मन्त्रिपरिषद् बैठकसमेत सुरु भएको छ।

वार्तामा कांग्रेस उपसभापति पूर्णबहादुर खड्का, अर्थमन्त्री विष्णु पौडेल, गृहमन्त्री रमेश लेखक, शिक्षामन्त्री रघुजी पन्त, एमाले महासचिव शंकर पोखरेल, कांग्रेस महामन्त्री गगन थापा र विश्वप्रकाश शर्मा सहभागी थिए। शिक्षक महासंघतर्फबाट अध्यक्ष लक्ष्मीकिशोर सुवेदीसहित तीन जना प्रतिनिधि सहभागी थिए।

प्रकाशित : १५ वैशाख २०८२, सोमबार 22:09