२५ करोड विदेशी मुद्राका साहु सिन्धुपाल्चोकका नारायण पौडेल

खासाको व्यापारदेखि रक्त चन्दन, सुन र विदेशी मुद्रा तस्करी सम्म

द नेप्लिज संवाददाता

२० चैत २०८१, बुधबार

विराटनगर– काठमाडौंको टोखा नगरपालिकास्थित झोरबाट बरामद भएको २५ करोड रुपैयाँ बराबरको विदेशी मुद्राका साहु सिन्धुपाल्चोकको भोटेकोशी गाउँपालिका–४ का नारायण पौडेल भएको खुलेको छ । उनी टोखा–१० महादेवटार हाइटमा बस्दै आएका थिए । एक प्रमुख राजनीतिक दल निकट पौडेलले उक्त मुद्रा चीन पठाउन लागेको राजस्व अनुसन्धान विभागले पत्ता लगाएको छ ।

फरार पौडेल विरुद्ध पक्राउ पूर्जी वारेन्ट जारी गरिएको उक्त विभागले जनाएको छ । गत चैत ४ को राति काठमाडौं उपत्यका अपराध अनुसन्धान कार्यालयको टोलीले टोखाको झोरबाट एक ट्रक र चालक कुशाङ लामालाई नियन्त्रणमा लिएको थियो । गाडीको जाँच गर्दा फल्सबटम बनाएर लुकाइएको २५ करोड बराबरको विदेशी मुद्रा बरामद भएको थियो ।

१३ लाख ७५ हजार १५० युरो र ३ लाख २० हजार ८५० डलर बरामद भएको घटनामा अनुसन्धान जारी छ । चालक लामाले रकम लैजानुअघि फोनमा पौडेलसँग कुराकानी गरेको पुष्टि भएको विभागले जनाएको छ ।

विभागले पौडेलका घर, कारोबारस्थल र गोदामहरूमा तलासी लिएको छ । पौडेल सिन्धुपाल्चोकका विवादास्पद व्यक्ति हुन् । उनका चार दाजुभाइमा केही राजनीतिक सक्रिय छन् तर उनीहरूको आपराधिक पृष्ठभूमि पनि उजागर भएको छ ।

पौडेललाई यसअघि पनि विदेशी मुद्रा अपचलनको कसुरमा पक्राउ गरिएको थियो । उनी धरौटीमा रिहा भएका थिए । पौडेलको आपराधिक गतिविधिको शुरूआत खासाको व्यापारबाट भएको थियो । माओवादी शान्ति प्रक्रियामा आएपछि उनी रक्तचन्दन तस्करीमा संलग्न भएको प्रहरी स्रोतको भनाइ छ ।

प्रहरीका अनुसार यो धन्दाबाट राम्रो आम्दानी गरेका पौडेलले खासाको व्यापार सेलाउँदै गएपछि सुन तस्करीलाई आफ्नो मुख्य पेसा बनाए । ट्रक चालक कुसाङ लामासँगको उनको फोन सम्पर्क र सीडीआर विश्लेषणले यो प्रकरणमा उनको प्रत्यक्ष हात रहेको देखाएको विभागको दाबी छ ।

यसअघि पनि पौडेल २०५९ मा हङकङमा करोडौं डलर तस्करी गरेको आरोपमा उनी राजस्व अनुसन्धान विभागबाट पक्राउ परेका थिए । ऊन आयातको नाममा नेपाल इन्भेष्टमेन्ट बैंकबाट एलसी खोल्ने तर ऊन आयात नगरी डलर तस्करी गर्ने उनको धन्दा त्यतिबेलै पर्दाफास भएको थियो ।

सोलु र पर्साका विभिन्न व्यक्तिको नाममा कम्पनी खोलेर उनले यो गैरकानूनी कारोबार सञ्चालन गरेका थिए । पक्राउपछि जेल बसेका पौडेलले ‘अदालतलाई मिलाएर’ छुटेको समाचार स्रोतले जनाएको छ ।

प्रहरीले पहिल्यै ने उनको तस्करीको सञ्जालमा अन्य व्यापारीको ठूलो समूह पनि संलग्न रहेको भनिसकेको छ । यसबाहेक २०८० को असार २ मा महाराजगञ्जस्थित एक घरमा जुवा अखडा चलाएको आरोपमा उनलाई प्रहरीले पक्राउ गरेको थियो ।

प्रहरीका अनुसार प्रहरी वृत्त महाराजगञ्जले उनलाई १ लाख ९० हजार नगदसहित पक्राउ गरेको थियो । तर त्यतिबेला भाइ राजकुमार पौडेल र अन्य माओवादी नेताहरूको दबाबमा उनी छुटेका थिए । पौडेलका भाइ राजकुमार २०७४ मा माओवादीबाट भोटेकोशी गाउँपालिकाको अध्यक्ष निर्वाचित भएका थिए भने अर्का भाइ बच्चु पौडेल हिमालय सीमापार व्यापार संघका निवर्तमान अध्यक्ष छन् । भाइ पालिका अध्यक्ष भएदेखिनै नारायण पनि माओवादीमा खुलेर लागेको स्थानीय बताउँछन् ।

राजनीतिक पहुँच र प्रभावका कारण पटक–पटक पक्राउ परे पनि उनलाई कानुनी कारवाही हुन सकेको छैन । हाल २५ करोड विदेशी मुद्रा प्रकरणमा पक्राउ गर्न प्रहरीलाई पत्राचार गरिए पनि पौडेल अहिलेसम्म फरार छन् । उनको खोजी तीव्र पारिएको प्रहरीले जनाएको छ ।

उनका जेठा दाइ ध्रुव पौडेल भने २०५४ सालमा नेकपा एमालेबाट तत्कालीन वडाध्यक्षमा निर्वाचित भएका थिए । साइला भाइ बच्चु पौडेललाई कांग्रेस निकट भनिए पनि पार्टीको आधिकारीक पदमा भने छैनन् । यसअघि ७ किलो सुनसहित यीनै चालकलाई प्रहरीले पक्राउ गरेपछि पनि राजकुमार केही समय सम्पर्कबिहिन भएका थिए । उनलाई पक्राउ गर्न अदालतले अनुमति समेत दिइसकेको छ । राजस्व अनुसन्धान विभागले टोखास्थित निवासमा छापा मारेर केही कागजातहरू समेत नियन्त्रणमा लिइसकेको छ । पौडेल भने ट्रक चालक पक्राउ परेलगतै फरार भएको विभागले जनाएको छ। प्रहरीले भने यो रकम सुन तस्करीको भएको सुरुमै अनुमान गरेको थियो।

उक्त ट्रकमा १०० दरका अमेरिकी डलर ३ हजार ११९ थान, ५० दरका १७९ थान र ५०० दरका युरो ११ थान, २०० दरका ४८० थान, १०० दरका ४ हजार १४८ थान र ५० दरका १७ हजार १७७ थान बरामद गरेको प्रहरीले जनाएको थियो । यसको नेपालीमा विनियम गर्दा करिब २५ करोड १९ लाख २४ हजार ९५० रूपैयाँ हुन आउँछ ।

प्रकाशित : २० चैत २०८१, बुधबार 20:50