उत्तराखण्डको चमोलीमा हिमपहिरो

४६ श्रमिकको उद्धार, ८ को मृत्यु/अपडेटेड

द नेप्लिज संवाददाता

१६ फागुन २०८१, शुक्रबार

विराटनगर– भारतको उत्तराखण्डस्थित चमोलीको माणामा शुक्रबार बिहान हिमपहिरोमा फसेका ५४ सडक निर्माण श्रमिकमध्ये आइतबार साँझ सम्म सम्म ४६ जनालाई उद्धार गरेर अस्पताल पुर्याइएको छ । उत्तराखण्डको मुख्यमन्त्री पुष्कर सिंह धामीले बाँकी ८ जनालाई बचाउन नसकिएकोमा दुःख व्यक्त गरेका छन् । उनीहरुको हिमपहिरोमा पुरिएर मृत्यु भएको थियो ।

उद्धार गरिएका कामदारलाई उत्कृष्ट स्वास्थ्य सुविधा प्रदान गरिरहेको उनले बताए । उद्धार गरिएकामध्ये गंभीर घाइते ३ जनाको आर्मी चिकित्सालयमा उपचार भइरहेको छ सेनाले युद्ध स्तरमा लगातार ६० घण्टा राहत र बचाउको काम गरेको उनले बताए ।

बद्रीनाथ धाम अगाडि माणामा हिमनदी फुट्दा यो दुर्घटना भएको बीबीसीले जनाएको छ । माणा र बद्रीनाथ बीचमा पर्ने बीआरओ लेबर क्याम्प हिम पहिरोको चपेटामा आएको हो । कामदारहरु फसेको थलो बद्रीनाथधामबाट ५२ किलोमिटर उत्तरमा रहेको माणा पासमा पर्छ ।

चमोली जिल्लाका मजिस्ट्रेट सन्दीप तिवारीले मिडियालाई माणा गाउँ र माणा पास बीचको सीमा सडक नजिकै हिमपहिरो गएको रिपोर्ट आएको बताएका थिए ।

घटना लगतै सेनाको स्विफ्ट रेसपोन्स टिम ‘आईबेक्स बिग्रेड’ का सयभन्दा बढी जवानलाई डक्टर, एम्बुलेन्स र अन्य उपकरण सहित खटाइएको थियो । । यो टोली शुक्रबार बिहान ११ बजेर ५० मिनेटदेखि उद्धारमा लागेका थिए । । उद्धार गरिएकामध्ये केहीको अवस्था गंभीर छ । तिवारीले भारत–तिब्बत सीमा पुलिस(आईटीबीपी), सेना राज्य विपद् प्रतिक्रिया बल र राष्ट्रिय विपद् प्रतिक्रिया बल पनि उद्धारमा खटिएको बताएका छन् ।

प्रकाशित : १६ फागुन २०८१, शुक्रबार 18:39