टुरिस्ट गाइड बन्ने चाहना छ ?

द नेप्लिज संवाददाता

२१ फागुन २०८१, बुधबार

तस्बिर : ग्लोबल प्रेस जर्नल

विराटनगर- गरिराखेको कामलाई पनि प्रशिक्षणले झनै तिखार्छ । नेपाल पर्यटन तथा होटल व्यवस्थापन प्रतिष्ठान (नाथम) ले टुरिष्ट गाइडदेखि बारटेन्डिङसम्म ३६० जनालाई दिन लागेको तालिम पनि इच्छुकका लागि यस्तै सुन्दर अवसर हो ।

गोरखापत्रमा बुधबार सूचना प्रकाशित गरेर नाथमले टुरिस्ट गाइडमा २०० जना, कुकमा ४० जना, बेकरीमा ४० जना, बारिस्टामा ४० जना र बारटेन्डिङमा ४० जनालाई तालिमका लागि दरखास्त आह्वान गरेको छ ।

तालिम अवधी पनि छोटै छ । टुरिस्ट गाइडमा दस साता, ‍कुकमा तीन महिना तथा बेकरी, बारिस्टा र बारटेन्डिङका लागि एक-एक महिनाको रहने नाथमले भनेको छ।

तालिम शुल्क टुरिस्ट गाइड र कुकका लागि २५/२५ हजार तथा बेकरी, बारिस्टा र बारटेन्डिङका लागि २०/२० हजार रुपैयाँ तय गरिएको छ।

टुरिस्ट गाइडका लागि न्यूनतम योग्यता स्नातक वा सो सरह तोकिएको छ । बाँकी चार विधाका लागि एसइई वा सोसरह निर्धारण गरिएको छ।

तालिमका लागि दरखास्त दस्तुर ५०० रूपैयाँ तोकिएको छ। रुची भएका र योग्यता पुगेकाहरूले अनलाइनमार्फत फाराम भर्न सक्छन्।

प्रकाशित : २१ फागुन २०८१, बुधबार 09:20