सत्य निरूपण आयोगमा पदाधिकारी सिफारिस प्रक्रिया अन्योलमा

द नेप्लिज संवाददाता

१३ चैत २०८१, बुधबार

काठमाडौं — सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन आयोगमा पदाधिकारी नियुक्ति प्रक्रिया अन्योलमा परेको छ ।

सरकारले पूर्वप्रधानन्यायाधीश ओमप्रकाश मिश्रको नेतृत्वमा सिफारिस समिति गठन गरेको थियो तर समितिले तोकिएको समयमा पदाधिकारी सिफारिस गर्न असफल भएको छ । समितिले दुई महिनाको कार्यावधिमा अध्यक्ष र सदस्य पदका लागि आवेदनहरू संकलन गरी ’सर्टलिस्ट’ तयार पारेको थियो ।

अध्यक्ष पदका लागि आठ र सदस्य पदका लागि ३२ जनाको नाम सिफारिस गरिएको थियो । तर समितिभित्र मतभेद उत्पन्न भएपछि सिफारिस प्रक्रिया रोकिएको छ । समितिले सरकारलाई नियुक्ति प्रक्रिया पुनः प्रारम्भ गर्न अनुरोध गरेको छ ।

यसले द्वन्द्वपीडितहरूमा निराशा बढाएको छ । उनीहरूले सरकारलाई शीघ्र र निष्पक्ष रूपमा पदाधिकारी नियुक्ति प्रक्रिया अघि बढाउन आग्रह गरेका छन् ।

प्रकाशित : १३ चैत २०८१, बुधबार 10:39