अधिकांश क्याम्पसमा शान्तिपूर्ण मतदान

द नेप्लिज संवाददाता

५ चैत २०८१, मङ्गलबार

विराटनगर- त्रिभुवन विश्वविद्यालय (त्रिवि) का आङ्गिक र सम्बन्धनप्राप्त क्याम्पसहरूमा स्वतन्त्र विद्यार्थी युनियन (स्ववियु) को निर्वाचन मंगलबार हुँदै छ। बिहान ८ बजेदेखि सुरु भएको मतदान प्रक्रिया अधिकांश क्याम्पसमा शान्तिपूर्ण रूपमा भइरहेको छ ।

हालसम्म १०७ क्याम्पसमा सभापति निर्विरोध निर्वाचित भएका छन्। अनेरास्ववियुबाट ४०, नेविसंघबाट ३५, अखिल क्रान्तिकारीबाट ३० र एकीकृत समाजवादीनिकट अनेरास्ववियुबाट दुई जना सभापति चयन भएका छन्। बाँकी क्याम्पसहरूमा निर्वाचनमार्फत नेतृत्व चयन हुनेछ।

तर, केही ठूला क्याम्पसमा विद्यार्थी नेताहरूबीचको अवरोध र विवादका कारण निर्वाचन स्थगित भएको छ। उपत्यकाभित्र विश्वविद्यालय केन्द्रीय क्याम्पस कीर्तिपुर, सरस्वती बहुमुखी, शंकरदेव, पब्लिक युथ, नेपाल ल र विश्वभाषा क्याम्पसमा मंगलबार निर्वाचन सम्पन्न हुन सकेन। उपत्यकाबाहिर बुटवल बहुमुखी क्याम्पस, सुर्खेत बहुमुखी, भैरहवा बहुमुखी, रामस्वरूप रामसागर बहुमुखी क्याम्पस जनकपुर, पक्लिहवा बहुमुखी क्याम्पस, तेह्रथुम बहुमुखी क्याम्पस र कृषि क्याम्पस खैरहनीमा पनि निर्वाचन स्थगित भएको छ। यी १३ क्याम्पसमध्ये कतिपयमा तोडफोड र कतिपयमा तालाबन्दीका कारण निर्वाचन रोकिएको हो।

बानेश्वर क्याम्पसमा समयमै मतदान सुरु नभएको भन्दै विवाद उत्पन्न भएको छ। निर्वाचन समितिले सर्वपक्षीय बैठक राख्न ढिलो गरेपछि मतदान सुरु हुन नसकेको र यसै कारण विद्यार्थी सङ्गठनहरूले विरोध जनाएका छन्। कतिपयले निर्वाचन सार्नुपर्ने माग समेत राखेका छन्। विवाद बढेपछि क्याम्पसमा प्रहरी परिचालन गरिएको छ भने निर्वाचन समितिले ढिलो भए पनि निर्वाचन सम्पन्न गर्ने बताएको छ।

यसैगरी, प्रदर्शनी मार्गस्थित रत्नराज्यलक्ष्मी (आरआर) क्याम्पसमा अनेरास्ववियुले क्याम्पस प्रशासनले नक्कली परिचयपत्र जारी गरेको आरोप लगाउँदै मध्यरातमा तालाबन्दी गरेको छ। यसको निष्पक्ष छानबिनको माग गरिएको छ। नेपाल विद्यार्थी संघ र अखिल क्रान्तिकारीले भने अनेरास्ववियुमाथि निर्वाचन हार्ने डरले तालाबन्दी गरेको आरोप लगाएका छन्।

त्यस्तै, लैनचौरस्थित अमृत साइन्स क्याम्पस (अस्कल) मा सुरक्षाको कारण देखाउँदै निर्वाचन स्थगित गरिएको छ। निमित्त क्याम्पस प्रमुख होमबहादुर बानियाँले सोमबार आह्वान गरिएको बैठकमा केही विद्यार्थी सङ्गठन अनुपस्थित भएकाले निर्वाचन स्थगित गरिएको जानकारी दिएका छन्।

यसरी, केही क्याम्पसमा विवाद र अवरोधका कारण निर्वाचन स्थगित भए पनि अधिकांश क्याम्पसमा स्ववियु निर्वाचन शान्तिपूर्ण रूपमा सम्पन्न हुँदै छ।

प्रकाशित : ५ चैत २०८१, मङ्गलबार 10:44