डिजिटल बोर्डमा प्रधानमन्त्रीविरुद्ध नारा प्रदर्शन गर्ने किशोर पक्राउ

द नेप्लिज संवाददाता

५ वैशाख २०८२, शुक्रबार

काठमाडौँ— प्रधानमन्त्री केपी शर्मा ओलीविरुद्ध नारा प्रक्षेपण गरिएको डिजिटल बोर्ड ह्याक गरेको अभियोगमा एक किशोरलाई प्रहरीले पक्राउ गरेको छ ।

पक्राउ पर्नेमा कक्षा १२ मा अध्ययनरत काठमाडौँका एक १६ वर्षीय किशोर छन् । प्रहरीले दिएको जानकारीअनुसार चैत १३ मा पानीपोखरीस्थित रोटरी क्लबले सडकछेउमा राखेको डिजिटल सूचना बोर्डमा प्रधानमन्त्रीविरुद्ध ‘...देश छोड’ भन्ने नारा देखाइएको थियो ।

प्रहरी प्रधान कार्यालय अन्तर्गत सूचना प्रविधि निर्देशनालयले गरेको प्रारम्भिक अनुसन्धानमा किशोरले मोबाइल एपमार्फत डिजिटल बोर्ड ह्याक गरेको खुलेको छ । युट्युबबाट ह्याक गर्ने तरिका हेरेपछि जिज्ञासावश उक्त कार्य गरेको अभियुक्तले प्रहरीलाई बयान दिएका छन् ।

जिल्ला प्रहरी परिसर काठमाडौंका एक अधिकृतका अनुसार उनीविरुद्ध विद्युतीय कारोबार ऐन अन्तर्गतको कसुरमा अनुसन्धान प्रक्रिया अगाडि बढाइएको छ । नेपालमा डिजिटल बोर्ड ह्याक गर्ने प्रवृत्ति बढेको छ । सिकारु ह्याकरहरुले समेत सस्तो साइबर सुरक्षा प्रणाली प्रयोग गरि बनाइएको सरकारी र निजी निकायहरुको डिजिटल संयन्त्रमा सहजै पहुँच बनाएर गलत एवं अशिष्ट सन्देश लेखिरहेका हुन्छन् ।

प्रकाशित : ५ वैशाख २०८२, शुक्रबार 22:00