रामनवमीमा सार्वजनिक बिदा

द नेप्लिज संवाददाता

६ चैत २०८१, बुधबार

काठमाडौं — सरकारले रामनवमीका अवसरमा चैत २४ मा सरकारी कार्यालय तथा सार्वजनिक निकायहरूमा सार्वजनिक बिदा दिने निर्णय गरेको छ।

सञ्चारमन्त्री पृथ्वीसुब्बा गुरुङका अनुसार, सोमबार बसेको मन्त्रिपरिषद् बैठकले नेपालको संविधानको धारा ५३ तथा सुशासन (व्यवस्थापन तथा सञ्चालन) ऐन २०६४ को दफा ४१ बमोजिम आर्थिक वर्ष २०८०/८१ को वार्षिक प्रतिवेदन राष्ट्रपतिसमक्ष पेश गर्ने निर्णय पनि गरेको छ।

बैठकले विद्यालय क्षेत्र सुधार कार्यक्रमका लागि विश्व बैंकमार्फत प्राप्त हुने अनुदान सहायता सम्बन्धी वार्ता गर्न अर्थ मन्त्रालयका सहसचिवको नेतृत्वमा वार्ता टोली गठन गर्ने निर्णय गरेको छ। साथै, ऋण असुली न्यायाधिकरणको बैंकिङ सदस्य पदमा नरेशराज अर्याललाई नियुक्त गर्ने निर्णय गरिएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी प्रमुख पदमा दिनेशप्रसाद भट्टलाई नियुक्त गर्ने निर्णय पनि मन्त्रिपरिषद्ले गरेको छ।

प्रकाशित : ६ चैत २०८१, बुधबार 16:14