रिंकु सदायको रहस्यमय मृत्यु प्रकरणमा थप दुई पक्राउ

द नेप्लिज संवाददाता

२९ फागुन २०८१, बिहीबार

विराटनगर– सिरहाको नवराजपुर–१ भगवतीपुरकी १७ वर्षीया किशोरी रिंकु सदायको सामूहिक बलात्कार र रहस्यम मृत्युको घटनामा थप दुई जनालाई पक्राउ गरिएको प्रहरीले जनाएको छ । पक्राउहरुमा स्थानीय ५५ वर्षीय कारी सदा र ६६ वर्षीय रामदेव सदा छन् । उनीहरूसँगै यो प्रकरणमा पक्राउ पर्नेको संख्या १० पुगेको छ ।

उनीहरूलाई २५ फागुनमा पक्राउ गरिएको सिरहा प्रहरी कार्यालयले जनाएको छ । प्रहरीका अनुसार सिरहा जिल्ला अदालतबाट म्याद लिएर विस्तृत अनुसन्धान भइरहेको छ । बलात्कारको घटनामा मिलापत्र गर्ने प्रयासमा उनीहरूको पनि भूमिका देखिएको प्रहरीले भनेको छ ।

यसअघि बलात्कारका मुख्य आरोपित रुपेश मण्डल तथा पञ्चायतीमा सहभागि वडासदस्य नथुनी साह, स्थानीय रामकृपाल मण्डल, विन्देश्वर साह, राजेन्द्र मण्डल, चन्देश्वर मण्डल, रामविनोद मण्डल र कमलेश दास पक्राउ परेका थिए ।
यसमध्ये रुपेश, नथुनी, रामकृपाल र विन्देश्वर जाहेरीमा नाम किटान गरिएकाहरु हुन् । अन्यको जाहेरीमा नाम किटान नगरिएको भएपनि पञ्चायतीमा सामेलहरु भएको प्रहरीले जनाएको छ ।

गत माघ २७ को राति शौच गर्न निस्केकी रिंकुलाई स्थानीय तीन युवकले सामूहिक बलात्कार गरेका थिए । उनले भोलिपल्ट बिहान रुँदै परिवारजनलाई सबथोक बताएकी थिइन् । तर माघ २९ र ३० मा पञ्चायती बसेर घटना गाउँमै मिलाउने प्रयास भएको थियो ।

पञ्चायतीले बलात्कारका पीडकबाट १ लाख ४० हजार जरिवाना तिराउँदै पीडितलाई प्रहरीमा जान नदिने निर्णय गरेको थियो । पञ्चायतीमा सहमती नहुँदा पीडक पक्षको धम्कीबीच माघ ३० को साँझ रिंकु घरमा झुन्डिएको अवस्थामा मृत भेटिएकी थिइन् । प्रहरीकोमा मुख खोल्छिन् भन्ने डरले मुख्य आरोपीहरुले नै रिंकुको हत्या गरेको स्थानीयले शंका गरेका छन् ।

प्रकाशित : २९ फागुन २०८१, बिहीबार 14:46