‘उडिसाको समस्या समाधान भयो’

द नेप्लिज संवाददाता

८ फागुन २०८१, बिहीबार

विराटनगर — परराष्ट्रमन्त्री डा आरजु राणा देउवाले उडिसास्थित कलिङ्गा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा नेपाली छात्राको मृत्यु र त्यसपछि भएको घटनाक्रमलाई नेपाल सरकारले गम्भीर रुपमा लिएर कूटनीतिक माध्यमबाट हल गरेको दाबी गरेकी छन् ।

ओमनको मस्कटमा आयोजित आठौँ हिन्द महासागर सम्मेलनमा सहभागी भएर स्वदेश फर्किएपछि उनी आज त्रिभुवन अन्तर्राष्ट्रिय विमानस्थलमा भ्रमणबारे पत्रकारहरुलाई जानकारी गराउँदै थिइन् । यस विषयमा बुधबार पनि आफूले उडिसाका उच्च शिक्षा मन्त्री सूर्यबंशी सुरजसँग फोन सम्पर्क गरेर प्रकृति लम्सालको मृत्युको निष्पक्ष अनुसन्धान र दोषीमाथि कानुनी कारबाहीका साथै नेपाली विद्यार्थीहरुलाई कलेजमा सुरक्षित वातावरण सहित पठनपाठनको व्यवस्थाका लागि आग्रह गरेको जानकारी दिइन् ।

भारतीय मन्त्री सुरजले पनि उक्त घटनालाई राज्य सरकारले गम्भीर रुपमा लिएको, प्रकृतिलाई न्याय र दोषीमाथि कारबाहीका लागि उच्चस्तरीय छानबीन समिति गठन गरिएको जानकारी गराएका थिए ।
मन्त्री देउवाले भनिन्,’उक्त घटना लगतै कूटनीतिक पहल सुरु गरेका हौँ । त्यसपछि विश्वविद्यालयले माफी मागेर विद्यार्थीलाई होस्टेल फर्काएको छ भने दुव्र्यवहार गर्ने कलेजका स्टाफलाई कारबाही गरेको छ ।’ परराष्ट्र मन्त्रालय र नेपाली राजदूतावास नयाँ दिल्लीले उडिसा सरकार र विश्वविद्यालय प्रशासनसँग सम्पर्कमा रहेर आवश्यक समन्वयका साथ काम गरिरहेको जानकारी उनले दिइन् ।

एक प्रश्नको जवाफमा मन्त्री डा देउवाले नेपाली विद्यार्थी हाल विश्वभर पुगेका तर सबैको तथ्यांक परराष्ट्रसँग नरहेको स्वीकारिन् । आगामी दिनमा यस्तो तथ्यांक परराष्ट्रमा नै रहने व्यवस्था गर्न सकिएमा उनीहरुको उद्धारका लागि सहज हुने बताइन् । उनले भनिन्,‘नेपालीहरु को, कहाँ र कुन अवस्थामा छन् भन्ने कुरा परराष्ट्रलाई थाहा छैन, समस्यामा परेपछि र उद्धार गर्नुपर्ने भएपछि थाहा हुन्छ । उनीहरुको उद्धार गर्नका लागि परराष्ट्रसँग पर्याप्त जनशक्ति पनि छैन । यसले गर्दा समस्या भइरहेको छ ।’

प्रकाशित : ८ फागुन २०८१, बिहीबार 14:24