नेविसंघका संस्थापन र काेइराला पक्षबीच झडप

द नेप्लिज संवाददाता

१५ फागुन २०८१, बिहीबार

विराटनगर- नेपाल विद्यार्थी संघ (नेविसंघ)का संस्थापन र शेखर काेइराला समूहबीच विराटनगरको महेन्द्र मोरङ क्याम्पसमा बिहीबार झडप भएको छ ।

काेइराला पक्षका नेविसंघका मोरङ जिल्ला सभापति सरोज पोखरेल र सचिव गुड्डु साहलाई संस्थापन पक्षका विद्यार्थीहरूले कुटपिट गरेकाे प्रत्यक्षदर्शीले बताए । पाेखरेलको नोबेल अस्पतालमा उपचार भइरहेको छ भने साहलाई सामान्य चाेट लागेकाे हाे ।

नेविसंघकाे क्याम्पस इकाइ समिति गठनकाे विषयमा भएकाे विवादमा कुटपिट भएकाे प्रत्यक्षदर्शी विद्यार्थीकाे भनाइ छ । आसन्न स्ववियु निर्वाचनको भागबन्डाको विषयमा समेत छलफल गर्न गएका बेला पोखरेल र साहमाथि हातपात भएको छ ।

संस्स्वथापन पक्षका स्ववियू सभापति जसवन्त पौडेल, स्ववियु सचिव एलिश ठकुरी, प्रशान्त यादवलगायत समूहले आफूमाथि कुटपिट गरेको पोखरेलको भनाइ छ । धारिलो हतियारसहित केही विद्यार्थी विवादमा उत्रिएपछि झडपको अवस्था सिर्जना भएको उनकाे भनाइ छ । घटनाबारे अनुसन्धान थालिएको जिल्ला प्रहरी कार्यालय मोरङले जनाएको छ ।

प्रकाशित : १५ फागुन २०८१, बिहीबार 15:44