देशभर वर्षाको संकेत, आज कम, भोलि बढी

द नेप्लिज संवाददाता

२७ चैत २०८१, बुधबार

काठमाडौँ — पश्चिमी वायु, स्थानीय प्रणाली र बंगालको खाडीबाट आएको जलवाष्पयुक्त वायुले देशका विभिन्न भागमा वर्षा र हिमपातको अवस्था निम्त्याएको छ । जल तथा मौसम विज्ञान विभागका अनुसार आज कोसी र मधेस प्रदेशमा हल्कादेखि मध्यम वर्षा हुने सम्भावना छ । उच्च हिमाली क्षेत्रमा हिमपात हुने प्रक्षेपण गरिएको छ ।

मौसमविद् रोजन लामिछानेले आज अपराह्नपछि काठमाडौं उपत्यकामा पनि हल्का वर्षाको सम्भावना रहेको बताए । ‘आजभन्दा भोलि वर्षाको सम्भावना अझ बढी छ,’उनले भने,‘शुक्रबार बिहान–राति पनि केही स्थानमा वर्षा हुने देखिएको छ ।’ भोलि (बिहीबार) कोसी, मधेस, वाग्मती र गण्डकी प्रदेशमा राम्रै वर्षाको सम्भावना छ । अन्य प्रदेशहरूमा पनि छिटपुट वर्षा हुने अनुमान छ ।

वर्षाको यो प्रणाली पश्चिमी वायु र स्थानीय प्रभावसँगै बंगालको खाडीबाट आएको नमीयुक्त वायुले सक्रिय बनाएको हो । विशेष गरी उच्च हिमाली क्षेत्रमा हिमपातले जनजीवनमा असर पुर्याउन सक्ने भन्दै मौसमविद्हरूले आवश्यक सतर्कता अपनाउन आग्रह गरेका छन् ।

प्रकाशित : २७ चैत २०८१, बुधबार 06:54