मानव स्वास्थ्य, पशुपंक्षी र वातावरण संरक्षणका लागि सर्वपक्षीय सहकार्य आवश्यक : मन्त्री राई

विराटनगर- भाैतिक पूर्वाधार विकास एवं स्वास्थ्य मन्त्री भूपेन्द्र राईले मानव स्वास्थ्य, पशुपंक्षी र वातावरण संरक्षणाका लागि सर्वपक्षीय सहकार्य र समन्वय आवश्यक रहेकाे बताएका छन् ।

स्वास्थ्य सेवा विभागले विराटनगरमा बुधबार आयाेजना गरेकाे प्रदेशस्तरीय एक स्वास्थ्य समिति स्थापना गर्ने सम्बन्धमा प्रस्तावित समिति उपर छलफल तथा एक स्वास्थ्य रणनीति परिमार्जन कार्यशालामा मन्त्री राईले मानव स्वास्थ्यसँगै पशुपंक्षी र वातावरण संरक्षण अपरिहार्य रहेकाे बताएका हुन् । यसकाे लागि प्रदेश सरकार नियमित सहकार्य र समन्वय गरेर अघि बढ्न तत्पर रहेकाे उनकाे भनाइ थियाे ।

कार्यशालामा प्रदेशमा मानव स्वास्थ्य, पशुपंक्षी र वातावरण संरक्षण सम्बर्द्धनका लागि प्रदेशस्तरी एक स्वास्थ्य निर्देशक र प्राविधिक समितिकाे संरचना र रणनीति निर्माण बारे छलफल भएकाे थियाे । मानव, पशुपंक्षीमा फैलिने कुनै किसिमकाे महामारी र स्वस्थ्य वातावरण निर्माणका लागि एक स्वास्थ्य निर्देशक समितिले प्राविधिक समितिमार्फत प्रदेशमा आवश्यक स्राेत साधन जुटाएर काम गर्ने स्वास्थ्य सेवा विभागका महानिर्देशक डा. टंक बाराकाेटीले बताएका हुन् ।

छलफलपछि स्वास्थ्य मन्त्रीकाे अध्यक्षतामा गठन हुने एक स्वास्थ्य निर्देशक समितिमा उद्याेग, कृषि तथा सहकारी मन्त्री, मन्त्रालयका सचिवहरूलगायत सराेकारवाला रहने प्रस्ताव गरेकाे छ । प्रदेश स्वास्थ्य निर्देशनालयका निर्देशककाे अध्यक्षतामा सम्बन्धित सराेकारवाला प्राविधिक रहने गरी प्रदेशस्तरीय एक स्वास्थ्य प्राविधिक समिति गठन गर्नेसमेत प्रस्ताव गरेकाे हाे । निर्देशक समितिकाे निर्देशनमा प्राविधिक समितिले प्रदेशभरि काम गर्ने छन् ।

स्वास्थ्य सेवा विभागका महानिर्देशक बाराकाेटीकाे अध्यक्षतामा सम्पन्न कार्यशालामा उद्याेग, कृषि तथा सहकारी मन्त्री खगेनसिं हाङगा, स्वास्थ्य र कृषि मन्त्रालयका सचिवलगायत सराेकारवालाकाे उपस्थिति रहेकाे थियाे ।