रिंकु र प्रकृतिका लागि प्रदर्शन

द नेप्लिज संवाददाता

१० फागुन २०८१, शनिबार

विराटनगर- सामूहिक बलात्कारको दुई दिनपछि मृत फेला परेकी सिराहाकी रिंकुकुमारी सदाय र भारतको उडिसास्थित केआईआईटी विश्वविद्यालयमा अध्ययनरत भैरहवाकी प्रकृति लम्सालको शंकास्पद मृत्यु घटनामा न्याय माग्दै विद्यार्थीले प्रदर्शन गरेका छन् ।

सिराहाको गोलबजारस्थित रामप्रताप रामप्रसाद तामाङ जनता बहुमुखी क्याम्पसमा अध्ययनरत विद्यार्थीले शुक्रबार ‘रिंकु र प्रकृतिलाई न्याय दे, घटनामा संलग्न अपराधीलाई कारबाही गर’लगायतका नारासहित बजार परिक्रमा गरे ।

उनीहरुले दुवै घटनामा संलग्नलाई कारबाहीका लागि दबाब दिन खोजिएको बताए । रिंकुले २७ माघको राति आफूलाई सामूहिक बलात्कार गरिएको पीडा पोख्दा समेत गाउँको अगुवा भेलाले आर्थिक लेनदेनमा मिलाउने प्रयास गरेका थिए ।

मधेस सरकारका आन्तरिक मामिला तथा सञ्चारमन्त्री राजकुमार लेखीले शुक्रबार पत्रकार सम्मेलन गर्दै रिंकु सदायको मृत्यु प्रकरणसँग जोडिएका आरोपी छिट्टै पक्राउ पर्ने दाबी गरेका छन् । अर्कोतिर दलित समुदायमाथि भइरहेको हिंसा, बलात्कार र अन्तरजातीय विवाह गर्ने जोडीमाथि राज्यसंयन्त्रकै संलग्नतामा भइरहेको दमन गर्नेहरूमाथि कडा कारबाही गर्न सरोकारवालाले माग गरेका छन् ।

प्रकाशित : १० फागुन २०८१, शनिबार 11:00