आईपीएलको १८ औँ संस्करण

तनाव, नाटकीयता र व्यक्तिगत उपलब्धिका कथा

द नेप्लिज संवाददाता

२२ जेठ २०८२, बिहीबार

अहमदाबाद (एएफपी)– विराट कोहली नेतृत्वको रोयल च्यालेन्जर्स बेंगलुरुले इन्डियन प्रिमियर लिग (आईपीएल) को १८औँ संस्करणमा अन्ततः ऐतिहासिक सफलता हासिल गर्दै पहिलो पटक उपाधि जितेको छ। पन्जाब किंग्सविरुद्धको रोमाञ्चक फाइनलमा बेंगलुरुले ६ रनको जित दर्ता गर्दै उपाधि उचालेको हो।

अन्ततः कोहली च्याम्पियन
दुईपटकको विश्वकप विजेता विराट कोहलीको खेलजीवनलाई लिएर एकमात्र अधुरो चाहना थियो— आईपीएल उपाधि। १८ वर्षसम्म उपाधिविहीन रहेका कोहलीले यसपटक त्यो सपना पनि पूरा गरे। बेंगलुरुको तर्फबाट ९ विकेटको क्षतिमा बनाएको १९० रनमा कोहलीले ४३ रन बनाएर व्यक्तिगत रूपमा पनि सर्वाधिक रनकर्ताको भूमिका निर्वाह गरे। संयोगवश, कोहलीको जर्सी नम्बर पनि १८ नै हो।

श्रेयस ऐरको कप्तानीमा पन्जाब उपविजेता
पन्जाब किंग्सका कप्तान श्रेयस ऐरले टीमलाई दोस्रोपटक फाइनलमा पुर्‍याए। ब्याटिङ लिलामीमा पन्जाबले सर्वाधिक रकम तिरेका श्रेयसले ६०४ रन बनाए, जसमा मुम्बई इन्डियन्सविरुद्धको एलिमिनेटर खेलमा बनाएको अविजित ८७ रन पनि समावेश छ। प्रशिक्षक रिकी पोन्टिङको विश्वासको केन्द्र रहेका श्रेयसको नेतृत्व र प्रदर्शन प्रशंसनीय रह्यो।

१४ वर्षे सूर्यवंशीको सनसनीपूर्ण प्रदर्शन
राजस्थान रोयल्सका १४ वर्षीय वैभव सूर्यवंशीले यसपटकको आईपीएलमा सनसनी मच्चाए। डेब्यू खेलमै पहिलो बलमा छक्का प्रहार गरेका सूर्यवंशीले गुजरातविरुद्ध ३५ बलमा शतक बनाए, जसमा ११ छक्का र ७ चौका समावेश थिए। अन्तिम खेलमा चेन्नई सुपर किंग्सविरुद्ध पनि उनले ५७ रनको योगदान दिए।

पन्तको निराशाजनक सिजन
लखनउ सुपर जायन्ट्सले भारतीय विकेटकिपर–ब्याट्सम्यान ऋषभ पन्तका लागि कीर्तिमानी रकम खर्चिए पनि उनी अपेक्षाअनुसारको प्रदर्शन गर्न असफल रहे। आक्रामक ब्याटिङमा चिनिएका पन्तले अन्तिम खेलमा रोयल च्यालेन्जर्स विरुद्ध शतक बनाउँदासमेत टिम भने लिग चरणमै प्लेअफ समीकरणबाट बाहिरियो।

तनावबीच रोकिएको प्रतियोगिता फेरि सञ्चालनमा
भारत–पाकिस्तानबीचको कूटनीतिक तनावले गर्दा आईपीएल मई ९ मा केही समयका लागि रोकिएको थियो। धर्मशालामा पन्जाब र दिल्ली क्यापिटल्सबीच खेल भइरहेका बेला जम्मूमा सुनिएको विस्फोटको आवाजले खेल स्थगित भएको हो। त्यसपछि खेलाडी तथा पदाधिकारीहरूलाई विशेष ट्रेनमार्फत नयाँ दिल्ली पुर्‍याइएपछि मई १७ बाट प्रतियोगिता पुनः सुरु गरिएको थियो।

१८औँ संस्करणको आईपीएल विराट कोहलीका लागि ऐतिहासिक रह्यो भने किशोर खेलाडी वैभव सूर्यवंशीका लागि यशप्राप्ति र भविष्यको सम्भावनाले भरिएको यात्रा। तनाव, नाटकीयता र व्यक्तिगत उपलब्धिका कथाहरूले भरिएको यस सिजनले क्रिकेटप्रेमीहरूलाई भावनात्मक बनाएको छ।

#आईपीएल १८# औँ #संस्करण

प्रकाशित : २२ जेठ २०८२, बिहीबार 09:47