भुटानी शरणार्थीहरूको भविष्य अन्योलमा

द नेप्लिज संवाददाता

१८ चैत २०८१, सोमबार

विराटनगर– अमेरिकाबाट ’डिपोर्ट’ भएका तीन भुटानी शरणार्थीे नेपाल आएका छन् । दमकको बेलडाँगी शरणार्थी शिविरमा पुगेका आशिष सुवेदी, सन्तोष दर्जी र रोशन तामाङलाई प्रहरीले नियन्त्रणमा लिएको हो । यस बारेमा अध्यागमन कार्यालय काँकडभिट्टाले अनुसन्धान गरिरहेको छ ।

उनीहरूलाई नेपालमा राख्ने कि पुनः भुटान फर्काउने विषयमा गृह प्रशासन अन्योलमा छ । भिसाबिनै प्रवेश गरेका उनीहरूमाथि अध्यागमन विभागले अनुसन्धान भइरहेको छ ।

सन् १९९० को दशकमा भुटानबाट लखेटिएका करिब डेढ लाख भुटानी शरणार्थीहरू झापा र मोरङका शिविरमा बस्दै आएका थिए । संयुक्त राष्ट्रसंघीय शरणार्थी उच्च आयोग (यूएनएचसीआर) को पहलमा एक लाखभन्दा बढी शरणार्थीहरू अमेरिका, क्यानडा, अस्ट्रेलियालगायत देशमा पुनर्वास भएका छन् ।

तर हालै अमेरिकाले भुटानी शरणार्थीहरूमध्ये केहीलाई आपराधिक गतिविधिमा संलग्न भएको आरोपमा पक्राउ गरी ’डिपोर्ट’ गरेको छ । भुटानले उनीहरूलाई नागरिकता दिन अस्वीकार गरेपछि उनीहरू नेपाल प्रवेश गरेका हुन् ।

यस घटनाले भुटानी शरणार्थीहरूको भविष्यप्रति गम्भीर प्रश्न उठाएको छ । नेपालमा रहेका शरणार्थीहरू भुटान फर्किन चाहन्छन्, तर भुटानले उनीहरूलाई स्वीकार्न अनिच्छा देखाएको छ । नेपाल सरकारले पनि शरणार्थीहरूको व्यवस्थापन र सुरक्षाका लागि आवश्यक कदम चाल्नुपर्ने देखिन्छ ।

प्रकाशित : १८ चैत २०८१, सोमबार 12:00