ज्ञानेन्द्रलाई विवादमा ल्याउन खोजेकोमा संवाद सचिवालय असन्तुष्ट

द नेप्लिज संवाददाता

१९ चैत २०८१, मङ्गलबार

काठमाडौं– सरकारले तीनकुनेमा १५ चैतमा भएको हिंसात्मक प्रदर्शनमा पूर्वराजा ज्ञानेन्द्र शाह जोडिएको ठहर गरेको छ ।

प्रधानमन्त्री केपी शर्मा ओलीले प्रतिनिधिसभामा सोमबार ज्ञानेन्द्र तर्फ संकेत गर्दै आपराधिक घटनामा कसैले पनि उन्मुक्ति नपाउने र फेरि राजा बन्छु भन्न चाहेको हो भने पछिल्ला श्रृंखलाबद्ध घटनाबारे आफ्नो धारणा सार्वजनिक गर्नुपर्ने बताएका थिए ।

ज्ञानेन्द्र बस्दै आएको निर्मल निवासमा नवराज सुवेदी र दुर्गा प्रसाईंसँग भएको भेटले पनि प्रधानमन्त्रीले शंका गरेका हुन् । उनले संविधानप्रति अनास्था, घृणा र भ्रम फैलाउन निर्मल निवास र निकटस्थहरू नै सक्रिय रहेको बताएका थिए ।
पूर्वराजा ज्ञानेन्द्र शाहको संवाद सचिवालयका सचिव फणिराज पाठकले तीनकुने प्रदर्शन र हिंसामा पूर्वराजालाई जोड्न खोजिएकामा आपत्ति जनाएका छन् ।

उनले राष्ट्रिय एकता र मेलमिलापबाहेक अरु चाहना पूर्वराजाको नभएको प्रष्ट गरे । आन्दोलनमा संलग्नसँगको भेटलाई पूर्वराजासँग जोड्नु पूरा अनुचित हुने बताए । उनले कतिपय दलकै नेताहरू पनि पूर्वराजासँग भेटिरहेको भन्दै कतिपय कुरा सार्वजनिक हुने र कतिपय नहुने गरेको बताए ।

‘राजाले सबैलाई भेट्ने, सबैका कुरा सुन्ने हो,’उनले एक सञ्चार माधयमसँग भने, ‘उहाँहरूकै दलका मान्छे पनि आउनु भएको होला, भेट्दिनँ भन्नु त भएन । त्यसैले सुवेदी, प्रसाईंलाई पनि भेटेको हो, तर कुनै षड्यन्त्र गर्न भेटेको होइन । नियमित र सामान्य किसिमकै भेट हो ।’

प्रमुख दलका नेताहरूले पूर्वराजाको भूमिकाकै कारण तीनकुनेको माहोल हिंसात्मक बनेको भन्दै उनलाई समेत छानबिनको दायरामा ल्याउनुपर्ने बताइरहेका छन् । उनको सेवासुविधा समेत कटौती हुनुपर्ने माग अघि सारिएको छ ।
पाठकका अनुसार १८ वर्षअघि गद्दी छाड्दा समेत हाँसीहाँसी गएका ज्ञानेन्द्रले यतिका वर्ष बाँचेको जीवनशैली हेरेर समेत गलत धारणा नबनाउन आग्रह गरे ।

प्रकाशित : १९ चैत २०८१, मङ्गलबार 15:53