जबर्जस्ती स्ववियू निर्वाचन गरिए आत्मदाह गर्ने दाहालको चेतावनी

विराटनगर– महेन्द्र मोरङ क्याम्पस स्ववियू निर्वाचनका नेविसंघ शेखर कोइराला समूहको सभापति उम्मेदवार योगराज दाहालले निर्वाचन अधिकृतले समस्या समाधान नगरी जबर्जस्ती चुनाव गराउन खोजिए आत्मदाह गर्ने चेतावनी दिएका छन् । निर्वाचनको मौन अवधि सुरु भइसकेपछि सभापति उम्मेदवार दाहालले आइतबार पत्रकार सम्मेलन गरी समस्या समाधानको माग गरेको हो । 

उनले पत्रकार सम्मेलनमा नेपाली कांग्रेस केन्द्रीय सदस्य तथा प्रदेश सांसद अमृत अर्याल र कांग्रेस मोरङ उपसभापति तथा विराटनगर महानगर प्रमुख नागेश कोइरालासँगको मिलेमतोमा स्ववियू निर्वाचन अधिकृत शुशिल अधिकारीले आफूहरुले नेविसंघको आधिकारिक्ताको चिठ्ठी दिँदादिँदै पनि स्वतन्त्र उम्मेदवारको सूचीमा आफ्नो प्यानलको नाम सार्वजनिक गरेको आरोप छ । क्याम्पस प्रशासनले फर्जी विद्यार्थीहरुको नाम मतदाता सूचीमा प्रकाशन गरेकोलाई अविलम्ब सच्याउनु पर्ने उनको माग थियो । उनले नेविसंघको मोरङ सभापति सरोज पोखरेललगायतलाई कुटपिट गर्नेलाई पक्राउ नगरिए आत्मदाह गर्न बाध्य हुने चेतावनी दिएको हो ।  

यसैबीच ननेविसंघ मोरङका सचिव गुड्डु साहले पनि आइतबार विज्ञप्ती जारी गरी महेन्द्र मोरङ क्याम्पसमा नेविसंघको योगराज दाहाललाई प्यानललाई स्वतन्त्र उम्मेदवार बनाउने कार्य सच्याउन माग गरेको छ ।