कुम्भमेलामा रुपन्देहीका ३ तिर्थालुको मृत्यु

द नेप्लिज संवाददाता

५ फागुन २०८१, सोमबार

विराटनगर– भारतको कुम्भमेलाबाट स्नान गरेर फर्किरहेका तिर्थालु सवार गाडी दुर्घटनामा तीन जनाको मृत्यु भएको छ । मृत्यु हुनेमा रुपन्देहीको देवदह नगरपालिका–९ का ४५ वर्षीय गणेश खनाल, उनकी श्रीमती ३५ वर्षीय दिपा खनाल र ४० वर्षीया गीता शर्मा छन् ।

उनीहरु युपी ५३ एफ डी ४२८८ नम्बरको भारतीय गाडीमा सवार थिए । भारत उत्तर प्रदेशको आजमगढ बाराणसी रोडको डिभाइडरमा उक्त गाडी ठोक्किएर अनियन्त्रित भइ दुर्घटना भएको हो । दुर्घटनामा चालकसहित पाँच घाइते भएका छन् । गाडी चालक निदाएर दुर्घटना भएको हुन सक्ने प्रहरीको प्रारम्भिक अनुमान छ । दुर्घटनामा घाइते हुनेहरूमा देवदह–९ भलुहीकी कोपिला पोखरेल, उनका छोरा सुभम पोखरेल, आविष्कार पराजुली, यमकलादेवी मगर र सवारी चालक भारतीय नागरिक रितेश दुबे छन् ।

उनीहरुलाई स्थानीय अस्पतालमा प्राथमिक हेरचाह पछि थप उपचारको लागि गोरखपुर पठाइएको भारतीय प्रहरीले जनाएको छ । फागुन ३ मा देवदहबाट महाकुम्भ मेला स्नान गर्न ५ वटा गाडीमा ३५ जना भारत गएकोमा नेपाल फर्किने क्रममा चालकसहित ८ जना सवार उक्त गाडी दुर्घटना भएको हो ।

प्रकाशित : ५ फागुन २०८१, सोमबार 14:14