माेरङ कारागारका एक बन्दीकाे मृत्यु

२९ माघ २०८१, मङ्गलबार

विराटनगर– मोरङ जिल्ला अदालतबाट मुद्दाकाे किनारा लाग्ने पर्खाइमा रहेका बन्दी २९ वर्षीय किसुन टुडु सतारको काेशी अस्पतालमा उपचारकाे क्रममा मंगलबार मृत्यु भएको छ । मोरङको रतुवामाई नगरपालिका–५ का उनी जबरजस्ती करणी मुद्दाको पूर्पक्षको क्रममा माेरङ कारगारमा थिए ।

अचानक रिंगटा लाग्ने र श्वासप्रश्वासमा गाह्रो हुने समस्या देखिएपछि उनलाई उपचारका लागि माघ २६ मा कोशी अस्पतालमा भर्ना गरिएकाे कारागारका जेलर गौरव ढुंगेलले बताए । टुडुको उपचारको क्रममा दिउँसाे पौन दुई बजे निधन भएको थियो । टुडुलाई अदालतले गत साउन ११ मा पूर्पक्षका लागि थुनामा राख्ने आदेश दिएको थियो । शव कोशी अस्पतालमै राखिएको छ । परिवारका सदस्य सम्पर्कमा आए पछि जिम्मा लगाउने जेलर ढुंगेलले बताए ।

प्रकाशित : २९ माघ २०८१, मङ्गलबार 20:01