मानव अधिकार समितिमा ‘हिंसात्मक’ बहस, सांसदद्वारा गोली हान्ने सम्मको धम्कि

द नेप्लिज संवाददाता

२९ चैत २०८१, शुक्रबार

फाइल तस्बिर

हिंसात्मक प्रदर्शनको चर्को आलोचना गर्दै नेपाली कांग्रेसकी सांसद नगिना यादवले पूर्वराजावादी अभियन्ता दुर्गा प्रसाईंको गतिविधिलाई ‘अराजकताको पराकाष्ठा’ भन्दै उनीमाथि गोली चलाउने आदेश दिनुपर्ने अभिव्यक्ति दिएकी छिन् ।
यादवले भनिन्, ‘जसरी तोकिएको निषेधित क्षेत्र जबरजस्ती तोडेका छन्, प्रहरीमाथि गाडी कुदाएका छन् । म मन्त्री भएको भए सुट गर्न आदेश दिन्थेँ ।’ सांसद यादवको यो अभिव्यक्तिसँगै तीनकुने घटनाको राजनीतिक तापक्रम अझ चुलिएको छ ।

काठमाडौँ — प्रतिनिधिसभाको कानुन, न्याय तथा मानव अधिकार समितिमा सांसदहरुले पदीय मर्यादा बिर्सेर देशको वर्तमान अवस्था र जनभावना विपरित बोलेका छन् । सामाजिक सञ्जालका प्रयोगकर्ताहरुले यसलाई ‘हिंसात्मक बहस’ को नाम दिएका छन् ।

गृहमन्त्री रमेश लेखकदेखि कांग्रेसकी सांसद नगिना यादव सम्मको शैलीलाई सामाजिक सञ्जालमा भारतको विहारका नेतानेतृहरुले बोल्ने शैलीसँग तुलना गरिएको छ । बैठकमा सामेलहरुले शब्द प्रहारले हिंसा गरेको भनिएको छ ।

लेखकले चैत १५ मा काठमाडौँको तीनकुनेमा भएको हिंसात्मक प्रदर्शनलाई आपराधिक र विध्वंसात्मक कार्यको संज्ञा दिँदै यस्ता गतिविधि लोकतान्त्रिक व्यवस्थामा स्वीकार्य नहुने भनेका छन् । उक्त समितिमा शुक्रबार बोल्दै लेखकले उक्त घटनाप्रति सरकार गम्भीर रहेको र यस्ता घटनाको पुनरावृत्ति रोक्न चनाखो रहेको बताए । उनले घटनाको निष्पक्ष छानबिन फौजदारी कानुनी प्रक्रियाबाट हुने जानकारी दिए ।

सांसदहरूले घटनाको सत्यतथ्य छानबिन गर्न छानबिन आयोग गठन गर्न माग गरेका थिए । गृहमन्त्री लेखकले सरकारले नियमित आपराधिक न्याय प्रणालीमार्फत निष्पक्ष छानबिन गर्ने प्रतिबद्धता जनाए । उनले सार्वजनिक सम्पत्ति लुटपाट, आगजनी र अराजकता गर्ने कार्यमा संलग्नहरूलाई पक्राउ गर्ने कार्य जारी रहेको बताए ।

उनले लोकतान्त्रिक व्यवस्थामा आगो लगाएर निरंकुशताको खोजी गर्नु कुनै पनि हिसाबले उचित नहुने बताए । उनले जनतामा गएर आफ्नो कुरा राखेर निर्वाचित हुने अधिकार संविधानले सबैलाई दिएको उल्लेख गरे । गृहमन्त्री लेखकले तीनकुने घटनामा मृत्यु भएकाका परिवारलाई १०/१० लाख रुपैयाँ राहत दिने प्रक्रिया अघि बढिसकेको बताए । घाइतेहरूको सरकारले निःशुल्क उपचार गर्ने व्यवस्था गरेको जानकारी दिए ।

बैठकमा सांसदहरूले तीनकुने घटनाको जिम्मेवारी पूर्वराजा ज्ञानेन्द्र शाहलाई दिनुपर्ने धारणा राखे । कांग्रेस सांसद जीवन परियारले ज्ञानेन्द्र शाहको भूमिकाका बारेमा बहस भएकाले समितिमा बोलाउन सुझाव दिए । एमाले प्रमुख सचेतक महेश बर्तौलाले ज्ञानेन्द्र शाहको आह्वानपछि भएको प्रदर्शन हिंसात्मक भएकाले राज्यले गम्भीर भएर अनुसन्धान गर्नुपर्ने बताए ।

राप्रपाका सांसद ध्रुवबहादुर प्रधानले तीनकुने घटना राज्यपक्षले नियोजितरूपमा घटाएको आरोप लगाए । उनले निष्पक्ष न्यायिक छानबिन भए त्यसदिन भएको कमीकमजोरी बाहिर आउने बताए । नेताहरूलाई झुटा मुद्दा लगाएर आस्थाका बन्दीका रूपमा नराखेर आपराधिक मुद्दा लगाउनु अत्यन्त आपत्तिजनक भएको उनको भनाइ थियो ।

हिंसात्मक प्रदर्शनको चर्को आलोचना गर्दै नेपाली कांग्रेसकी सांसद नगिना यादवले पूर्वराजावादी अभियन्ता दुर्गा प्रसाईंको गतिविधिलाई ‘अराजकताको पराकाष्ठा’ भन्दै उनीमाथि गोली चलाउने आदेश दिनुपर्ने अभिव्यक्ति दिएकी छिन् ।
यादवले भनिन्, ‘जसरी तोकिएको निषेधित क्षेत्र जबरजस्ती तोडेका छन्, प्रहरीमाथि गाडी कुदाएका छन् । म मन्त्री भएको भए सुट गर्न आदेश दिन्थेँ ।’

उनले चैत १५ को दिन प्रसाईंले राजधानीको तीनकुने क्षेत्रमा आयोजित प्रदर्शनमा प्रहरीमाथि गाडी हुत्याउँदै निषेधित क्षेत्र तोडेको र त्यही भिडियो देशभर भाइरल भएको उल्लेख गरिन् । ‘त्यत्रो सुरक्षाकर्मीलाई पेलेर जान मिल्छ ? कस्तो नैतिकता हो यो ? ऊ सर्वोपरी हो? उसले जे बोले पनि हुने?“ भन्दै यादवले आक्रोश पोखिन् ।

उनले थप भनिन्, ‘प्रहरीकै हतियार खोस्नु भनेको अराजकताको पराकाष्ठा हो । सबैको हतियार खोसेको भए के हुन्थ्यो ? त्यसपछि मात्र प्रहरीले गोली चलाएको हो । जोसुकै दोषी होस्, कडाभन्दा कडा कारबाही हुनुपर्छ ।’

सांसद यादवको यो अभिव्यक्तिसँगै तीनकुने घटनाको राजनीतिक तापक्रम अझ चुलिएको छ । चैत १५ मा आयोजित प्रदर्शनका क्रममा दुर्गा प्रसाईं नेतृत्वको समूहले निषेधित क्षेत्र उल्लंघन गर्दै आक्रामक शैलीमा सुरक्षाकर्मीमाथि गाडी चलाएको, प्रहरीका हतियार खोस्ने प्रयास गरिएको र त्यसपछि स्थिति नियन्त्रण गर्न प्रहरीले हवाइ फायरसमेत गरेको पुष्टि प्रहरी स्रोतहरूले गरेका छन् । प्रसाईंलाई घटनाको मुख्य योजनाकारको रूपमा चिह्नित गर्दै प्रहरीले पक्राउ गरेको छ भने गृहमन्त्रीले ‘रेगुलर क्रिमिनल जस्टिस सिस्टम’ अन्तर्गत निष्पक्ष छानबिन हुने बताएका छन् ।

प्रकाशित : २९ चैत २०८१, शुक्रबार 19:39