लागूऔषध कारोबारीमाथी गोली प्रहार

द नेप्लिज संवाददाता

२२ फागुन २०८१, बिहीबार

सुनसरी– धरान उपमहानगरपालिका–२० बाट हवाई फायर गरी लागूऔषध गाँजा ओसारपसारमा संलग्न १ जनालाई प्रहरीले पक्राउ गरेको छ । धनकुटाको साँगुरीगढी नगरपालिका–९ का ४३ बर्षीय हरि कुमार राईलाई पक्राउ गरेको हो ।

गएराती १ बजे लागूऔषध गाँजा ओसारपसार भईरहेको विशेष सूचनाको आधारमा इलाका प्रहरी कार्यालय धरान, वडा प्रहरी कार्यालय धरान र अस्थायी प्रहरी पोष्ट जोरसखुवाबाट घटनास्थलतर्फ प्रहरी टोली खटिएको थियो । विष्णुपादुकाबाट रेल्वेतर्फ जंगलको बाटोबाट शंकास्पद अवस्थामा भारी बोकी आउँदै गरेका व्यक्तिहरुमाथी प्रहरीले ३ राउण्ड हवाई फायर गरी नियन्त्रणमा लिएको कोशी प्रदेश प्रहरीले जनाएको छ ।

प्रहरीले हवाई फायरपछि अन्य व्यक्तिहरु भाग्न सफल भए पनि राईलाई पक्राउ गर्न सफल भएको हो । घटनास्थलबाट प्रहरीले २ सय २५ किलो गाँजा भएको ९ वटा भारी बरामद गरेको र उक्त गाँजा ओसारपसारमा संलग्न अन्य व्यक्तिहरुको खोजी कार्यसँगै अनुसन्धान भइरहेको प्रदेश प्रहरीले जनाएको छ ।

प्रकाशित : २२ फागुन २०८१, बिहीबार 16:48