चाडपर्वमय मिथिला

द नेप्लिज संवाददाता

१७ चैत २०८१, आइतबार

तस्बिर : सुलभयात्रा डट कम

विराटनगर- मधेसको प्राचीन मिथिला क्षेत्र चैत शुक्लपक्ष सुरु भएसँगै चाडपर्वको उल्लासमा डुबेको छ। हिन्दू मैथिल समुदायका लागि महत्वपूर्ण वासन्ती नवरात्र आज चैत शुक्ल प्रतिपदादेखि औपचारिक रूपमा सुरु भएको छ।

यसै क्रममा चैती छठ पर्वको तयारी पनि तीव्र बनेको छ। यस वर्ष संयोगवश इस्लाम धर्मावलम्बीहरूको महान् पर्व इद पनि यही अवधिमा परेकाले मिथिला बहुसांस्कृतिक पर्वमय बनेको छ।

चैत शुक्ल प्रतिपदादेखि नवमीसम्म नवदुर्गाको आराधनासहित मनाइने वासन्ती नवरात्र हिन्दू धर्मावलम्बीहरूको प्रमुख पर्व हो। यो पर्व असोज महिनामा पर्ने शारदीय नवरात्र जस्तै महत्वपूर्ण मानिन्छ।

महोत्तरी, धनुषा, सिरहा, सप्तरीलगायत मिथिलाका प्रमुख शक्तिपीठहरू—बर्दिबासस्थित पञ्चधुरा माई मन्दिर, औरहीको सोनामाई मन्दिर, जलेश्वरस्थित राजदेवी माई मन्दिर तथा त्रिशूली देवी मन्दिरमा विशेष पूजाआराधना सुरु भएको छ।

विशेष गरी त्रिशूली देवी मन्दिर वर्षमा केवल वासन्ती र शारदीय नवरात्रको अवसरमा मात्रै सर्वसाधारणका लागि खुला गरिन्छ।

मिथिलामा नवरात्रको समयमा अर्को विशेष पर्व—चैती छठ पनि मनाइन्छ। कात्तिक शुक्ल पक्षमा मनाइने शारदीय छठ जस्तै, चैती छठ पनि सूर्य उपासनासहित कठोर व्रत बसी मनाइन्छ। यस पर्वका लागि जनकपुर, विराटनगर, राजविराज, लहान, मलंगवा जस्ता ठाउँका तलाउ, नदी किनार तथा जलाशयहरूमा तयारी तीव्र छ।

भक्तजनहरूले जलाशय सफा गर्ने, बाँसको कोसी सजाउने तथा प्रसाद तयारी गर्ने कार्यमा जुटेका छन्।

यस वर्ष वासन्ती नवरात्र र चैती छठ पर्वको समय इस्लाम धर्मावलम्बीहरूको पवित्र रमजान महिनाको समापनसँगै इद पर्वसँग जुधेको छ। इद–उल–फित्रको उल्लासले मिथिला क्षेत्रको विविधता झल्काएको छ। मधेसका विभिन्न शहरहरू—जनकपुर, वीरगन्ज, मलंगवा, राजविराज, लहान आदिमा इदका लागि विशेष तयारी गरिएको छ।

मस्जिदहरूमा सामूहिक नमाजको तयारी भइरहेको छ भने मुस्लिम समुदाय नयाँ लुगा खरिद, सेवई तथा मिठाइ बनाउने कार्यमा व्यस्त छन्।

वासन्ती नवरात्र, चैती छठ र इदको संगमले मिथिला क्षेत्रलाई साँस्कृतिक विविधताको अनुपम उदाहरणका रूपमा प्रस्तुत गरेको छ। धार्मिक सहिष्णुता र आपसी सद्भाव झल्काउने यी पर्वहरूले सामाजिक ऐक्यबद्धतालाई थप मजबुत बनाउने स्थानीय धार्मिक अगुवाहरू बताउँछन्। मिथिलावासीहरूका लागि यो समय साँच्चै चाडपर्वको बहार बनेको छ।

प्रकाशित : १७ चैत २०८१, आइतबार 09:57