सापटी दिएको रकम माग्दा...

द नेप्लिज संवाददाता

१८ फागुन २०८१, आइतबार

विराटनगर– छरछिमेकी, आफन्त र साथी भाइमा सापटी लेनदेन भइरहन्छ । सापटी लिने बेइमान परेमा झगडा र विवाद पनि हुन्छ । तर दिएको रकम फिर्ता माग्दा बैतडीमा एक जनाको शनिबार राति गोली हानी हत्या गरिएको छ ।

प्रहरीका अनुसार दोगडाकेदार–८ कालागाउँ चौसिलाका जीप चालक २३ वर्षीय सुरेन्द्र विष्टलाई दाजु नाता पर्ने छिमेकी ४५ वर्षीय कर्णबहादुर विष्टले गोली प्रहार गरेका थिए । साथीहरुसँग होटेलमा खाना खाइरहेको बेला कर्णबहादुरले सुरेन्द्रलाई पछाडिबाट ढाडमा भरुवा बन्दुकले गोली हानेको प्रहरीले जनाएको छ ।

प्रहरीका अनुसार उक्त घटनाका साक्षी एवं सँगै खाइरहेका एक जनाले सुरेन्द्रलाई समातेर बसे भने बाँकी दुईजना कर्णबहादुरलाई लखेट्दै गएका थिए । रातिको समयमा जंगलै जंगल भागेका कर्णबहादुरलाई उनीहरूले समात्न सकेनन् ।

प्रहरीको प्रारम्भिक अनुसन्धानअनुसार सुरेन्दले कर्णबहादुरबाट ४० हजार रूपैयाँ पैसा लिनुपर्ने थियो । यही विषयमा शनिबार साँझ पनि झगडा भएको थिया । झगडाको क्रममा सुरेन्द्रले कर्णबहादुरलाई दुई झापड लगाएका थिए । गाउँलेहरूले उनीहरुलाई छुटाएका थिए । स्थानीयका अनुसार त्यतिबेला पनि कर्णबहादुरले सुरेन्द्रलाई धम्की दिँदै ‘तँलाई छाड्दिन’ भनेका थिए ।

प्रहरीका अनुसार सुरेन्द्रको हत्या गर्ने कर्णबहादुरविरूद्ध यसअघि चोरी शिकारीको मुद्दा पनि थियो । उक्त मुद्दा हालसालै मात्रै छिनोफानो भएको हो । प्रहरी टोलीले स्थानीयको सहयोगमा उद्धार गरी घाइते सुरेन्द्रलाई अस्पताल पुर्याउँदा चिकित्सकले मृत घोषणा गरेको थियो । फरार रहेका कर्णबहादुरको खोजी व्यापक पारिएको प्रहरीले जनाएको छ । प्रहरी टोलीहरुले जंगलभित्र, नाका र राजमार्गमा खोजी गरिरहेको छ ।

प्रकाशित : १८ फागुन २०८१, आइतबार 17:09