डेढ करोड ठग्ने तीन पक्राउ

द नेप्लिज संवाददाता

१४ फागुन २०८१, बुधबार

विराटनगर– आकर्षक तलब पाउने गरी विभिन्न देशहरू हुँदै अमेरिका पठाइदिने भनेर झण्डै डेढ करोड रुपैयाँ ठगी गरेको आरोपमा ३ जनालाई सोमबार प्रहरीले पक्राउ गरेको छ । ललितपुर महालक्ष्मी–४ बस्ने रूकुम पश्चिम मुसिकोट–१ का २४ वर्षीय मनिषराज खड्का, काठमाडौं टोखा–३ बस्ने रूकुम पश्चिम मुसिकोट–२ का २७ वर्षीय मधु कुमार खड्का र ३४ वर्षीय बिरेन्द्र खड्कालाई पक्राउ गरिएको केन्द्रीय प्रहरीले जनाएको छ ।

उनीहरूले १ करोड ४४ लाख ५० हजार रूपैयाँ लिई सम्पर्कबिहीन भएको भन्ने दुई पीडितहरूको उजुरीको आधारमा काठमाडौं उपत्यका अपराध अनुसन्धान कार्यालयको टोलीले मनिषराजलाई काठमाडौं–९ बाट तथा मधु कुमार र बिरेन्द्रलाई टोखा–८ बाट पक्राउ गरेको हो । उनीहरूलाई आवश्यक अनुसन्धान तथा कारवाहीको लागि जिल्ला प्रहरी परिसर काठमाडौंँको थुनामा राखिएको छ ।

प्रकाशित : १४ फागुन २०८१, बुधबार 17:30