नो केबलकार समूहद्वारा थप आन्दोलनको कार्यक्रम घोषणा

द नेप्लिज संवाददाता

२८ माघ २०८१, सोमबार

विराटनगर– पाथीभरामा निर्माणाधीन केबलकारविरुद्ध आन्दोलनरत पक्षले थप आन्दोलनको कार्यक्रम घोषणा गरेको छ । नेपाल सरकारका सहसचिवस्तरीय वार्ताबाट समस्या समाधान नभए पछि पुनः आन्दोलनको घोषणा गरेको हो ।

उनीहरुले फागुन ६ देखि ८ सम्म ‘मुक्कुमलुङ बचाऊ पदयात्रा’ गर्ने, केबलकार अनुमति तथा सम्झौता खारेजीका लागि फुङलिङ नगरपालिका घेराउ, काठमाडौं, इटहरी र विर्तामोडमा केबलकार निर्माणविरुद्ध विरोध सभा गर्नेलगायत आन्दोलनका कार्यक्रम घोषणा गरेका छन् ।

आन्दोलनरत पक्षको प्रतिनिधित्व गरिरहेका सन्तोष मेहेताले यो विषय राजनीतिक मुद्दा भएकोले मन्त्रीस्तरीय वा उच्चस्तरीय वार्ता टोलीसँगमात्रै वार्ताको माग गरेको बताए । सरकारी पक्षले केबलकार जसरी पनि बनाउने अडानमा छ । त्यसका लागि सेयर, रोजगारीलगायतमा मिलाउने प्रस्ताव अघि सारेको मेहेताले बताए । तर आन्दोलनरत पक्ष कुनै प्रलोभवमा फसेर आन्दोलन तुहाउने अवस्था नरहेको स्पष्ट पारेका हुन् ।

प्रकाशित : २८ माघ २०८१, सोमबार 15:27