कांग्रेसमा सरकारविरुद्ध आवाज तीव्र, देउवा रोक्न मैदानमा

द नेप्लिज संवाददाता

४ वैशाख २०८२, बिहीबार

काठमाडौ — सत्तारुढ गठबन्धनको सहकार्यमा रहेको नेपाली कांग्रेसभित्र सरकारप्रति असन्तुष्टि बढ्दो रहेको सन्दर्भमा पार्टी सभापति शेरबहादुर देउवाले नेताहरूलाई संयमित रहन निर्देशन दिएका छन् । बिहीबार आफ्नै निवास बुढानिलकण्ठमा पदाधिकारी बैठक बोलाउँदै देउवाले सरकारबारे धारणा सार्वजनिक गर्नु अघि पार्टीभित्र गम्भीर छलफल गर्नुपर्ने बताएका हुन् ।

बैठकमा देउवाले कांग्रेसका प्रभावशाली नेताहरूबाट सार्वजनिक रुपमा भइरहेका आलोचनालाई लक्षित गर्दै ‘सरकारको आलोचना गर्नुपरे पार्टीको औपचारिक संरचनामार्फत गर्नुपर्ने’ धारणा राखेको प्रवक्ता डा. प्रकाशशरण महतले जानकारी दिए ।

‘हामीले आफ्ना भनाइ सार्वजनिक गर्नुभन्दा पहिला पार्टी संरचनामा राख्नुपर्छ, त्यहाँबाट आएका निष्कर्षलाई मात्रै बाहिर ल्याउनुपर्छ,’ महतले बैठकपछि भने । उनका अनुसार बैठकमा सहभागी नेताहरूले सभापतिको भनाइलाई महसुस गरेको बताएका छन् ।

तर पदाधिकारी बैठक सकिनासाथ महामन्त्री विश्वप्रकाश शर्माले सार्वजनिक रूपमा फरक अभिव्यक्ति दिएका छन् । शर्माले प्रधानमन्त्रीलाई ‘आफ्ना मात्र मन्त्री राखेर सरकार चलाउन सकिने हो भने त्यसो गर्नू’ भन्ने सुझाव दिएका छन् । ‘जो प्रधानमन्त्री, उसैको टिम । काँग्रेसका मन्त्रीहरू कारण काम गर्न गाह्रो भयो भने हामी बहिर्गमनको तयारी गर्न सक्नुपर्छ,’ शर्माले भनेका छन् ।

यसअघि, कांग्रेस नेताहरू—शेखर कोइराला, गगन थापा र शर्माले सरकारको कार्यशैलीप्रति खुलेर असन्तुष्टि जनाउँदै आएका थिए । उनीहरूको आलोचना माओवादी केन्द्रका अध्यक्ष पुष्पकमल दाहाल ’प्रचण्ड’ले समेत समर्थन गरेजस्तो देखिएको थियो । केही दिनअघि प्रचण्डले ओली नेतृत्वको सरकार लामो समय टिक्न नसक्ने दाबी गर्दै राजनीतिक बजारमा तरंग सिर्जना गरेका थिए ।

दुई दलीय गठबन्धनबीच बुधबार आयोजित संयन्त्रको बैठकमा प्रधानमन्त्री केपी शर्मा ओली र सभापति देउवाले ‘स्थिति नियन्त्रणमा रहेको’सन्देश दिएका थिए । बिहीबारको पदाधिकारी बैठकमा पनि सरकारलाई सुधारको सल्लाहसहित गठबन्धनलाई मजबुत बनाउने सहमति बनेको प्रवक्ता महतले बताए ।

‘सरकारको पर्फमेन्स अझै राम्रो बनाउनुपर्छ । समन्वय र सन्तुलन आवश्यक छ । सरकारले तालमेल सुधारेर अघि बढ्नुपर्छ,’ महतले भने । उनका अनुसार सभापति देउवाले प्रधानमन्त्री ओलीसँग निरन्तर संवाद भइरहेको र नियुक्तिसम्बन्धी निर्णयहरूमा समन्वय गर्न आग्रह गरिसकेको बताएका छन् । सरकार ढल्ने विषयमा प्रचण्डले दिएको अभिव्यक्तिलाई खण्डन गर्दै महतले भने, ‘विपक्षी दलले सरकार ढलोस् भन्ने चाहन्छन्, तर त्यस्ता अभिव्यक्तिका आधारमा सरकार नबन्छ, नढल्छ ।’

प्रकाशित : ४ वैशाख २०८२, बिहीबार 21:18