पूर्वप्रहरी महानिरीक्षक प्रदीप शमशेरको ७८ वर्षको उमेरमा निधन

द नेप्लिज संवाददाता

३१ चैत २०८१, आइतबार

काठमाडौँ– नेपाल प्रहरीका पूर्वमहानिरीक्षक (आईजीपी) प्रदीप शमशेर जबराको ७८ वर्षको उमेरमा शनिबार राति काठमाडौंको नर्भिक अस्पतालमा निधन भएको छ । प्रहरी प्रधान कार्यालयका एक अधिकृतका अनुसार उनको आजै बिहान ११ बजे पशुपति आर्यघाटमा अन्त्येष्टि गरिनेछ ।

प्रदीप शमशेर २०५७ असोजदेखि २०५९ पुससम्म नेपाल प्रहरीको महानिरीक्षकको रूपमा कार्यरत थिए । उनको कार्यकालमा महेन्द्र पुलिस स्विमिङ कम्प्लेक्सको स्थापना भएको थियो जसमा करिब ७ करोड रुपैयाँ खर्च भएको थियो । त्यसैगरी २०५८ मा दरबार हत्याकाण्ड पनि उनको कार्यकालमै भएको थियो ।

प्रदीप शमशेरका छोरा दीपशमशेर जबरा हाल प्रहरी वरिष्ठ उपरीक्षक (एसएसपी) पदमा कार्यरत छन् । परिवारका सदस्यहरूका अनुसार राणा केही समयदेखि स्वास्थ्य समस्याबाट पीडित थिए र नर्भिक अस्पतालमा उपचार गराइरहेका थिए । राणाको निधनप्रति नेपाल प्रहरीका वर्तमान तथा पूर्वअधिकारीहरू, सुरक्षाकर्मीहरू र सर्वसाधारणहरूले गहिरो दुःख व्यक्त गरेका छन् । प्रहरी संगठनमा उनको योगदान सधैं सम्झनायोग्य रहनेछ ।

प्रकाशित : ३१ चैत २०८१, आइतबार 09:16