लेखकको चेतावनी : म मात्र जानुपर्ने दिन गए

१४ जेठ २०८२, बुधबार

विराटनगर— भिजिट भिसाको नाममा मानव बेचबिखन प्रकरणमा मुछिएका गृहमन्त्री रमेश लेखकले पदबाट राजीनामा नदिने स्पष्ट अडान लिएका छन्। उनले प्रतिपक्षी दलहरूमाथि आक्रोश पोख्दै आफूविरुद्ध षड्यन्त्र गरिएको आरोप समेत लगाएका छन्।

मंगलबार र बुधबार प्रतिनिधि सभामा भिजिट भिसा सम्बन्धी प्रकरणमा जवाफ दिन समय मागेका लेखकलाई प्रतिपक्षीको अवरोधका कारण बोल्न नदिइएपछि बुधबार साँझ पत्रकार सम्मेलन गर्दै उनले आफ्नो पक्ष राखे। यो अवसरमा गृहमन्त्री लेखकले प्रतिपक्षी सांसदहरूमाथि तीखा प्रश्न उठाउँदै राजीनामाको माग अस्वीकारे।

‘एउटा कर्मचारीमाथि प्रश्न उठ्दैमा राजनीतिक नेतृत्वले राजीनामा दिँदै जाने हो भने मुलुक कहाँ पुग्छ?’ भन्दै उनले प्रतिपक्षीलाई लक्षित गरे। साथै ‘भोलि प्रतिपक्षी दलका नेताहरू पनि मन्त्री बन्नुहुने हो, ख्याल गर्नुस्। म मात्र शासनमा बस्ने होइन, तपाईंहरूले पनि बसेको हो, बस्नुहुनेछ,’ भन्दै उनी प्रतिपक्षीलाई सचेत गराउँदै थिए।

लेखकले प्रश्न उठाउने माननीयहरूलाई आगामी दिनमा पनि यस्ता प्रश्नहरूको सामना गर्नुपर्ने चेतावनी समेत दिए। उनले भने, ‘यदि आज मलाई यस्तो प्रश्न गरेर पदत्याग गर्न भन्नु हुन्छ भने भोलि तपाईंहरूलाई पनि त्यसैगरी प्रश्न गरिनेछ। त्यसबेला तपाईंहरूले पनि राजीनामा दिनुपर्ने हुन्छ।’

गृहमन्त्री लेखकले यसरी पदत्यागको माग गर्नु मुलुकमा संस्थागत दण्डहीनतालाई बढावा दिने खालको व्यवहार भएको जिकिर गरे। साथै उनले आफूमाथि भइरहेको आलोचना र मागहरूलाई ‘राजनीतिक षड्यन्त्र’ को संज्ञा पनि दिए।

उनले अघिल्ला तीन वर्षमा अख्तियार दुरुपयोग अनुसन्धान आयोगले मन्त्रालयका कर्मचारीहरू विरुद्ध गरेका छानबिनका विवरणहरू प्रस्तुत गर्दै अघिल्ला गृहमन्त्रीहरूले त्यसबेला राजीनामा नदिएको उदाहरण पनि उल्लेख गरे। ‘कर्मचारीमाथि छानबिन भएको थियो, तर मन्त्रीले राजीनामा दिएका थिएनन्,’ भन्दै उनले आफूले पनि नदिने स्पष्ट संकेत गरे। यो प्रकरणले सत्तापक्ष र प्रतिपक्षबीचको तनाव झनै चर्किएको छ भने संसदमा पनि यस विषयले राजनीतिक बहसलाई तीव्र बनाएको छ।

#राजीनामा# नदिने

प्रकाशित : १४ जेठ २०८२, बुधबार 21:23