कृषिमा यान्त्रिकीकरणका लागि रतुवामाईका किसानलाई एक करोडको औजार उपकरण

द नेप्लिज संवाददाता

२१ जेठ २०८२, बुधबार

विराटनगर– रतुवामाई नगरपालिकाले कृषिको आधुनिकीकरण तथा यान्त्रिकीकरणका लागि किसानलाई एक करोड १० लाख मुल्य बराबरको कृषि औजार तथा उपकरण वितरण गरेको छ । नगरपालिकाको ५० प्रतिशत अनुदान र किसानहरुको ५० प्रतिशत साझेदारीमा नगरपालिकाले कृषि औजार तथा उपकरण वितरण गरेको हो ।

नगरपालिकाले एक कार्यक्रमको आयोजना गरी पालिकास्थित १० वटै वडाका १ सय ६० कृषक समूह तथा कृषि फर्महरुलाई कृषि औजार तथा उपकरण वितरण गरेको छ । १ सय ५० थान च्यापकटर मेशिन, २० थान स्प्रे ट्यांकी, १ सय १२ थान मकै छोडाउने मेशिन, १ सय ६५ थान मकै रोप्ने मेशिन लगायतका औजार उपकरण वितरण गरिएको हो ।

रतुवामाई नगरपालिका प्रमुख नागेश्वरप्रसाद सिंहले किसानहरुलाई औजार तथा उपकरण वितरण गरेका छन् । नगरापकिाका प्रमुख प्रसासकिय अधिकृत डम्वरुप्रसाद वरालले कृषि यान्त्रिकीकरण प्रबर्द्धन कार्यक्रमअन्तर्गत किसानहरुलाई कृषि औजार तथा उपकरण वितरण गरिएको जनाएका हुन् ।

नगर प्रमुख सिंहले अधिकांश पालिकावासीको प्रमुख पेसा कृषि नै रहेकाले कृषि क्षेत्रलाई प्राथमिकतामा राखेर कृषि औजार तथा उपकरण वितरण गरेको बताएका छन् । ‘कृषिको आधुनिकीकरणका लागि यान्त्रिकीकरण गर्दै व्यवसायिक खेती गर्नु अहिलेको राष्ट्रिय आवश्यकता हो,’ उनले भने, ‘त्यसैले कृषिमा उत्पादन र उत्पादक वृधिका लागि यन्त्र, उपकरण अपरिहार्य भएकोले ५० प्रतिशत अनुदानमा खरिद गरी वितरण गरेका हौं ।’

किसानहरुको समस्या अनन्त रहेको अवस्थामा पालिकाको बजेटले भ्याएसम्म आधुनिक तरिकाले व्यवसायिक खेतितर्फ अभिप्रेरित गर्न किसानहरुलाई सहुलियत प्रदान गर्ने पालिकाको नीति रहेको प्रमुख सिंहको भनाइ छ ।

प्रकाशित : २१ जेठ २०८२, बुधबार 21:52