पाथीभरा दर्शनका लागि गइरहेका चार जनाको मृत्यु, दुई घाइते

द नेप्लिज संवाददाता

८ वैशाख २०८२, सोमबार

विराटनगर — ताप्लेजुङको फुङलिङ नगरपालिका–१० स्थित सडक खण्डमा पाथीभरा दर्शनका लागि गइरहेको बोलेरो गाडीमा करेन्ट लागेर आगलागी हुँदा चार जनाको ज्यान गएको छ । दुई जना घाइते भएका छन् ।

कोशी प्रदेश प्रहरी कार्यालयका अनुसार सोमबार बिहान मे १ ज ३०११ नम्बरको बोलेरो गाडीमा अचानक विद्युत् लाइनको तार खस्दा गाडीमा आगो लागेको हो । गम्भीर आगलागीपछि चार जनाको घटनास्थलमै मृत्यु भएको हो ।

मृत्यु हुनेहरूमा ललितपुर महानगरपालिका–१० की १६ वर्षीया आध्या आचार्य, झापा भद्रपुर नगरपालिका–१५ निवासी ७० वर्षीय विनोद पौडेल, उनकी श्रीमती ६९ वर्षीया सरिता पौडेल र गाडी चालक फुङलिङ नगरपालिका–१० का ४२ वर्षीय दुर्गा भट्टराई रहेका छन्। यात्रु लिएर जीप बिहान करिब ५ बजेतिर सदरमुकाम फुङलिङबाट हिँडेको थियो। दुर्घटनामा परी मृत्यु भएकाको शव नचिनिने अवस्थामा रहेको स्थानीयले जनाएका छन् ।

घटनामा ललितपुरकी ४५ वर्षीया सविना आचार्य गम्भीर घाइते छिन् भने उनका १० वर्षीय छोरा भविमय आचार्य मध्यम घाइते छन् । दुवैलाई थप उपचारका लागि हेलिकप्टरमार्फत काठमाडौँ लग्ने तयारी भइरहेको उक्त प्रहरी कार्यालयले जनाएको छ । प्रहरीका अनुसार गाडीमाथि कसरी विद्युत् तार खसेर दुर्घटना भयो भन्ने विषयमा अनुसन्धान भइरहेको छ ।

प्रकाशित : ८ वैशाख २०८२, सोमबार 07:53