राजनीतिक पृष्ठभूमि नभएका कार्नी क्यानाडाको नयाँ प्रधानमन्त्री

द नेप्लिज संवाददाता

२६ फागुन २०८१, सोमबार

तस्बिर : एपी

विराटनगर- कुनै पनि खाले राजनीतिक पृष्ठभूमि नभएका ५९ वर्षीय मार्क कार्नी क्यानाडाको प्रधानमन्त्री बन्ने भएका छन्‌ ।

बैंक अफ क्यानाडा र बैंक अफ इङ्ल्याण्डका पूर्वगभर्नर कार्नीलाई क्यानडाको सत्तारूढ लिबरल पार्टीले नयाँ नेता चयन गरेको हो । उनी अब देशका आगामी प्रधानमन्त्री बन्ने पक्कापक्की भएको छ ।

यस वर्षको सुरुवातमा पदबाट राजीनामा दिएका जस्टिन ट्रुडोको स्थान कार्नीले लिनेछन् । कार्नीले ८६ प्रतिशत सदस्यहरूको मत प्राप्त गरेका छन् ।

कुनै राजनीतिक पृष्ठभूमि नभएको व्यक्ति क्यानाडाको प्रधानमन्त्री बन्न लागेको यो पहिलोपटक भएको अन्तर्राष्ट्रिय समाचार एजेन्सीहरुले जनाएका छन् ।

राजनीतिका नयाँ अनुहार कार्नीले पार्टीलाई पुनर्जीवित गर्न र अमेरिकी राष्ट्रपति डोनाल्ड ट्रम्पसँग व्यापार वार्ता गर्न आफू सबैभन्दा उपयुक्त व्यक्ति भएको तर्क गरेका छन् ।

कार्नीले भनेका छन्, ‘जी–७ का दुई केन्द्रीय बैंकहरूको गभर्नरको रूपमा सेवा गर्ने पहिलो व्यक्ति भएको नाताले मेरो अनुभवले प्रमाणित गर्छ कि म ट्रम्पसँग व्यवहार गर्न सबैभन्दा सक्षम छु ।’

ट्रम्पले क्यानाडामा अतिरिक्त कर लगाउने भन्दै आएका छन् । त्यसो भएमा क्यानडाको निर्यात–निर्भर अर्थतन्त्रलाई असर गर्न सक्ने अनुमान छ ।

मार्क कार्नी क्यानाडाको फोर्ट स्मिथ, नर्थवेस्ट टेरिटोरीजमा जन्मेका हुन् । उनले आफ्नो बाल्यकाल एडमन्टनमा बिताए । उनी यस पछि अमेरिका गएर हार्बर्ड विश्वविद्यालयबाट अर्थशास्त्र अध्ययन गरे । उनी बेलायत पनि बसे । अक्सफोर्ड विश्वविद्यालयबाट पहिले मास्टर डिग्री तथा १९९५ मा अर्थशास्त्रमा विद्यावारिधि (पीएचडी) उपाधि प्राप्त गरे ।

कार्नीलाई २००८ मा बैंक अफ क्यानडाको गभर्नर नियुक्त गरिएको थियो । उनको नेतृत्वलाई छिट्टै विश्वव्यापी रूपमा चिनिन थालियो ।

२०१० मा टाइम म्यागजिनले उनलाई विश्वका २५ सबैभन्दा प्रभावशाली नेताहरूको सूचीमा समावेश गर्‍यो । २०११ मा, रिडर्स डाइजेस्ट क्यानाडाले उनलाई ‘सबैभन्दा भरपर्दो क्यानाडेली’ को उपाधि प्रदान गर्‍यो ।

२०१२ मा युरोमनी म्यागजिनले उनलाई ‘सन् २०१२ को उत्कृष्ट केन्द्रीय बैंक गभर्नर’ घोषित गर्‍यो‌ । २०१३ मा कार्नी बैंक अफ इङ्ल्याण्डका गभर्नर बनेर संस्थाको ३ सय वर्षको इतिहासमा यस पदमा पुग्ने पहिलो गैरबेलायती नागरिक बने । उनी २०२० सम्म उक्त पदमा रहे ।

हालका वर्षहरूमा, मार्क कार्नी संयुक्त राष्ट्रसंघको जलवायु कार्य तथा वित्तसम्बन्धी विशेष दूत र ब्रुकफिल्ड एसेट म्यानेजमेन्टको ट्रान्जिसन इन्भेस्टिङ प्रमुखका रूपमा काम गरिरहेका थिए । उनले यी पदहरूबाट राजीनामा दिएर क्यानाडाको लिबरल पार्टीको नेतृत्वका लागि प्रतिस्पर्धा गर्ने निर्णय गरेका थिए ।

यता जस्टिन ट्रुडोले सोमबार क्यानडाका प्रधानमन्त्रीको रूपमा आफ्नो अन्तिम भाषण गरे । लिबरल पार्टीका सदस्यहरूको भीडलाई सम्बोधन गर्दै ट्रुडोले आफ्नो कार्यकालप्रति गर्व व्यक्त गरे । उनले नागरिकहरूलाई देशको भविष्यको चिन्ता गर्न आग्रह गरे ।

उनले भने, ‘मलाई गलत नबुझ्नुहोस्, पछिल्लो १० वर्षको उपलब्धिहरूमा म धेरै गर्व गर्छु । तर आजको रात एक पार्टीको रूपमा, एक देशको रूपमा, हाम्रो भविष्यबारे सोच्ने समय हो ।’

उनले आर्थिक चिन्ताबारे पनि उल्लेख गरेका छन् । यसमा अमेरिकी राष्ट्रपति डोनाल्ड ट्रम्पका नीतिहरूलाई सूक्ष्म रूपमा भनिएको छ ‌। उनले भने, ‘हामी त्यस्तो देश हौँ, जसले लड्नुपर्छ, हामी अघि बढेर लड्ने छौँ।’ लोकतन्त्र र स्वतन्त्रताको निरन्तर प्रयास आवश्यक हुने उनले भनेका छन् ।

‘यसका लागि साहस, बलिदान, आशा र कडा मिहिनेत चाहिन्छ । पछिल्लो १० वर्षमा प्राप्त उपलब्धिहरूलाई मात्रै सम्झेर बस्नुहुँदैन । यसको सट्टा, आउँदो १० वर्ष र त्यसपछिका दशकहरूमा अझ धेरै हासिल गर्नुपर्ने छ,'उनले भने ।

प्रकाशित : २६ फागुन २०८१, सोमबार 09:26