देशभर आंशिक बदली र चट्याङसहित वर्षाको सम्भावना, महाशाखाद्वारा सतर्कता आग्रह

द नेप्लिज संवाददाता

९ जेठ २०८२, शुक्रबार

विराटनगर – हाल देशमा पश्चिमी वायु, स्थानीय वायु र बङ्गालको खाडी तथा अरब सागरबाट आएको जलवाष्पयुक्त हावाको संयुक्त प्रभाव देखिएको मौसम पूर्वानुमान महाशाखाले जनाएको छ। यस प्रभावका कारण कोशी, मधेस, बागमती, गण्डकी, लुम्बिनी र अन्य पहाडी भूभागमा आंशिकदेखि सामान्य बदलीको अवस्था रहेको छ भने अन्य क्षेत्रहरूमा मौसम सफादेखि आंशिक बदली छ।

मधेस, बागमती, लुम्बिनी र कर्णाली प्रदेशका पहाडी भागका केही स्थानहरूमा चट्याङसहित हल्का वर्षा भइरहेको छ। आज दिउँसो पनि कोशी, मधेस, बागमती, गण्डकी र लुम्बिनी प्रदेशसहित पहाडी क्षेत्रमा आंशिकदेखि सामान्य बदलीको सम्भावना रहेको छ। यी प्रदेशका थोरै स्थानमा र अन्य प्रदेशका पहाडी भागका एक–दुई स्थानमा चट्याङसहित हल्कादेखि मध्यम वर्षा हुन सक्ने महाशाखाले जनाएको छ।

यसैगरी, देशका उच्च पहाडी तथा हिमाली भेकका एक–दुई स्थानमा हल्का वर्षासहित हिमपातको सम्भावना पनि रहेको छ। रातिको समयमा कोशी, मधेस, बागमती, गण्डकी र सुदूरपश्चिम प्रदेशसहित अन्य पहाडी भूभागमा समेत चट्याङसहित हल्कादेखि मध्यम वर्षा र हिमपात हुने अनुमान गरिएको छ।

यस प्रकारको मौसमले दैनिक जनजीवन, कृषि, स्वास्थ्य, सडक तथा हवाई यातायातमा प्रभाव पार्न सक्ने भएकाले महाशाखाले सतर्क रहन सबैलाई आग्रह गरेको छ।

#मौसम #पूर्वानुमान

प्रकाशित : ९ जेठ २०८२, शुक्रबार 06:39