आदित्यनाथको फोटो बोक्ने राणाले भारतमा शरण लिए

द नेप्लिज संवाददाता

२८ फागुन २०८१, बुधबार

विराटनगर– पूर्वराजा ज्ञानेन्द्र शाहको स्वागत र्यालीमा आइतबार भारतको उत्तर प्रदेशको मुख्यमन्त्री योगी आदित्यनाथको तस्बिर बोकेका ५८ वर्षीय प्रदीपविक्रम राणाले नेपाल प्रहरीले खोजीरहेकाले भागेर गोरखपुर शरण लिनु परेको बताएका छन् । उनले ‘नवभारत टाइम्स’सँग आफूलाई पक्राउ गर्न प्रहरी परिचालन गरिएकै कारण भारतमा शरण लिनुपरेको बताएका छन् । नेपालबाट भागेर मंगलबार उत्तर प्रदेशको गोरखपुर आइपुगेको नवभारत टाइम्सको अनलाइन संस्करणमा उल्लेख छ ।

राणालाई उद्धृत गरिएको समाचारमा भारत सरकार र योगीजीसँग मिलेर नेपालको वर्तमान सरकारविरुद्ध षड्यन्त्र रचेको आरोप लगाइएको छ । पूर्वराजा ज्ञानेन्द्र पोखराबाट आइतबार काठमाडौं फर्किंदा आफू स्वागतका लागि त्रिभुवन विमानस्थलमा पुगेको राणाले बताएका छन् । उनले भनेका छन्, ‘यस क्रममा मैँले राजा र उत्तर प्रदेशका मुख्यमन्त्री योगी आदित्यनाथको पोस्टर एकसाथ बोकेको थिएँ । मलाई लाग्छ, जसरी योगीजी हिन्दु र हिन्दुत्वका लागि लगातार संघर्ष गर्दै आउनुभएको छ, उहाँ हामी सबैको वैश्विक नेता हो । धार्मिक मान्यता अनुसार पनि म उहाँलाई धेरै मन पराउँछु ।’

राणाले योगी आदित्यनाथसँग आफ्नो भेट कहिल्यै नभएको बताएका छन् । नवभारत टाइम्सको अनलाइन संस्करणमा राणालाई उद्धृत गर्दै लेखिएको छ, ‘ कुनै भारतीय राजनेतासँग भेट गरेको छैन, पैसा लिनु त परको कुरा । म आफ्नो राजा ज्ञानेन्द्र शाह र योगी आदित्यनाथजीको सम्मान गर्दछु । मेरो गल्ती यत्ति हो ।’ आफू नेपाललाई हिन्दु राष्ट्र बनाइनुपर्छ भन्ने पक्षमा संघर्षरत रहेको राणाले बताएका छन् । ‘म निकै मुस्किलले लुक्दै–भाग्दै त्यहाँबाट निस्किएँ । नेपालमा राजतन्त्र पुनर्वहाली गर्ने र फेरि नेपाललाई हिन्दु राष्ट्र बनाउने आफ्नो लडाइँ मेरो सास रहुन्जेलसम्म जारी राख्छु,’ उनले भनेका छन् ।

प्रकाशित : २८ फागुन २०८१, बुधबार 13:33