बेलुन विष्फोटमा गृहमन्त्रालयद्वारा छानबिन समिति गठन

द नेप्लिज संवाददाता

४ फागुन २०८१, आइतबार

विराटनगर– पोखरा भ्रमण वर्ष–२०२५ को शुभारम्भ समारोहमा बेलुन विष्फोटमा अर्थमन्त्री विष्णु पौडेल र मेयर धनराज आचार्य घाइते भएको घटना छानबिन गर्न आठ सदस्यीय समिति गठन भएको छ ।

पोखरा प्रदर्शनी केन्द्रमा भ्रमण वर्ष उद्घाटन गर्ने क्रममा हाइड्रोजन भरिएका बेलुनका झुप्पा आगोको झिल्कामा परी विष्फोट भएको थियो । नजिकै रहेका पौडेल र आचार्य घाइते भएका थिए । उनीहरु दुवैलाई शनिबार काठमाडौंको कीर्तिपुरस्थित बर्न अस्पतालमा भर्ना गरिएको थियो ।

गृहमन्त्री लेखक शनिबार बेलुकी कीर्तिपुर अस्पतालमा भर्ना पौडेल र आचार्यको अवस्था बुझ्न अस्पताल पुगेका थिए । बेलुन विस्फोट के, कसरी भयो भन्नेबारे विस्तृत छानबिन र यसप्रकारका कार्यक्रम गर्दा अवलम्वन गर्नुपर्ने सतर्कताका उपायसहितको प्रतिवेदन पेश गर्न १५ दिनको समय दिइएको गृह मन्त्रालयले जनाएको छ ।

गृहमन्त्री लेखकले आइतबार बिहान मन्त्रीस्तरको निर्णयबाट कास्कीका प्रमुख जिल्ला अधिकारी भरतमणि पाण्डेको संयोजकत्वमा आठ सदस्यीय छानविन समिति गठन गरेका हुन् । समितिमा पोखरा महानगरपालिकाका प्रमुख प्रशासकीय अधिकृत शिवराज चौलागाई, कास्कीका प्रहरी प्रमुख प्रहरी उपरीक्षक श्यामबाबु ओलिया, सशस्त्र प्रहरीका २४ नम्बर गण हेटक्वाटरका प्रमुख सशस्त्र प्रहरी उपरीक्षक सुर्यप्रसाद तिमिल्सिना र राष्ट्रिय अनुसन्धा जिल्ला कार्यालयका उपअनुसन्धान निर्देशक सुरेश कुमार तिवारी सदस्य छन् ।

समितिको सदस्य सचिव कास्कीका सहायक प्रमुख जिल्ला अधिकारी गंगाबहादुर क्षेत्री छन् । समितिमा एक विष्फोटक पदार्थ विज्ञ समेत रहने गृहमन्त्रीको सचिवालयले जनाएको छ । समितिले आइतबारदेखि नै काम थालिसकेको छ ।

प्रकाशित : ४ फागुन २०८१, आइतबार 15:00