शिक्षकले सडकमा सुतेर गरे प्रदर्शन

द नेप्लिज संवाददाता

२३ चैत २०८१, शनिबार

विराटनगर– काठमाडौं केन्द्रित आन्दोलन गरिरहेका शिक्षकहरुले शनिबार नयाँ बबरमहल–बानेश्वरको सडकमा सुतेर प्रदर्शन गरेका छन् । केही दिनदेखि बबरमहल–नयाँ बानेश्वर सडकमा नारा–जुलुससहित प्रदर्शन गरेका शिक्षकहरूले आज फरक शैलीमा आधा घण्टा सुतेर प्रदर्शन गरेका हुन् ।

नेपाल शिक्षक महासंघको नेतृत्वको आन्दोलनका लागि देशभरका शिक्षकहरू काठमाडौं आएका छन् । शिक्षकहरूले शिक्षा ऐनको माग गर्दै आन्दोलनमा उत्रिएका हुन् । यसबेला संसदको अधिवेशन पनि अन्त्य भएकोले शिक्षकहरूले अध्यादेशबाट भए पनि ऐन बनाउन माग गरेका छन् ।

अध्यादेश सम्भव नभए छिट्टै बर्खे अधिवेशन बोलाएर ऐन बनाउनुपर्ने या त विशेष अधिवेशन बोलाएर पनि आफूहरूको माग पूरा गर्नुपर्ने अडान शिक्षकहरूले राखेका छन् । आन्दोलनरत शिक्षकहरुले सरकारले तीन दिनभित्र दुई पटक बोलाएको वार्ता पनि अस्वीकारेका छन् ।

प्रकाशित : २३ चैत २०८१, शनिबार 13:58