‘योद्धा’ गाडीमा ३२३ किलोग्राम गाँजा

द नेप्लिज संवाददाता

९ वैशाख २०८२, मङ्गलबार

सुनसरी– नेपाल–भारत सीमामा लागूऔषध तस्करीको श्रृंखला रोकिएको छैन । सुनसरीको कोशी गाउँपालिका–१ स्थित भन्सार कार्यालय अगाडिबाट मंगलबार बिहान प्रहरीले करिब ३२३ किलो २१० ग्राम गाँजा र २ ग्राम खैरो हेरोइन जस्तो देखिने पदार्थ सहित भोजपुरको अरुण गाउँपालिका–५ निवासी २६ वर्षीय तेजेन्द्र कार्कीलाई नियन्त्रणमा लिएको छ ।

नेपाल प्रहरीका अनुसार यो हालसम्मको चालु वर्षमा एकैपटकमा सीमाबाट बरामद गरिएको ठूलो परिमाणको गाँजा मध्येको हो । लागूऔषध नियन्त्रण ब्यूरो, विराटनगर शाखा र इलाका प्रहरी कार्यालय, लौकहीबाट संयुक्त रूपमा खटिएको टोलीले भारतबाट नेपालतर्फ आउँदै गरेका कार्कीलाई शंका लागेपछि जाँचका क्रममा नियन्त्रणमा लिएको हो ।

प्रारम्भिक अनुसन्धानपछि उनले चलाएका प्रदेश १–०२–००२ च ५३४८ नम्बरको ‘योद्धा’ गाडी जाँच गर्दा उक्त गाँजा फेला परेको हो । प्रहरी स्रोतका अनुसार गाँजा विशेष रूपमा प्याक गरेर गाडीभित्र लुकाइएको थियो ।

बरामद गरिएको खैरो पदार्थको परीक्षणपछि मात्र त्यसको वास्तविक प्रकृति पुष्टि हुने बताइएको छ । प्रारम्भिक अनुमानमा उक्त पदार्थ हेरोइन हुन सक्ने आशंका गरिएको छ।

गाँजाको तस्करी बढ्दो : सीमावर्ती क्षेत्र असुरक्षित
नेपाल प्रहरीको अनुसार पछिल्लो समय पूर्वी तराईका सीमावर्ती क्षेत्रहरूबाट भारत हुँदै तेस्रो मुलुकतर्फ गाँजा तस्करीको जोखिम बढ्दो क्रममा छ । नेपालमा गाँजा खेती गर्न, ओसारपसार वा व्यापार गर्न निषेध छ तर सीमामा प्रहरीको उपस्थिति कमजोर हुने वित्तिकै यस प्रकारका गतिविधिहरू बढिरहेका छन् ।

कार्कीमाथि अनुसन्धान जारी
प्रहरीले कार्कीलाई लागूऔषध (पहिलो संशोधन) ऐन, २०३३ बमोजिम मुद्दा दर्ता गरी थप अनुसन्धान अघि बढाएको छ । उक्त गाडी कुन प्रयोजनका लागि प्रयोग गरिएको थियो, गाँजा कहाँबाट ल्याइएको हो र अन्तिम गन्तव्य कहाँ थियो भन्नेबारे अनुसन्धान भइरहेको जिल्ला प्रहरी कार्यालय सुनसरीले जनाएको छ।

प्रकाशित : ९ वैशाख २०८२, मङ्गलबार 19:59