तेली कल्याण समाजद्वारा महिला सम्मानित

द नेप्लिज संवाददाता

३० चैत २०८१, शनिबार

विराटनगर– तेली कल्याण समाज मोरङले समाज, जाति, कूलको गौरब बढाउने कार्य गरेका १८ जना महिलालाई शनिबार सम्मान गरेको छ । रौतहटको मौलापुर नगरपालिका प्रमुख रीनाकुमारी साहले महिलाहरुलाई फूलमाला, अबिर, सम्मानपत्र प्रदान गर्दै दोसल्ला ओढाएर सम्मान गरेका हुन् । कार्यक्रममा समाजले प्रकाशन गरेको क्यालेण्डसमेत प्रमुख साहले लोकार्पण गरिन् ।

प्रमुख साहले तेली कल्याण समाजले सम्मान कार्यक्रम गरेर महिलाहरुलाई घुम्टो बाहिर ल्याउने महत्वपूर्ण कार्य गरेको भन्दै प्रशंसा गरिन् । उनले पालिकाहरुले नगर प्रहरी नियुक्त गरेको तर आफूले नगर शिक्षक र चिकित्सक नियुक्त गरेर मौलापुर नगरवासीलाई शिक्षा र स्वास्थ्य सेवामा पहुँच अभिवृधि गरेको बताइन् ।

कार्यक्रममा गढी गाउँपालिका उपाध्यक्ष अनिता साहले समाजमा योगदान पुर्‍याएकी महिलाहरुलाई प्रशंसापत्र वितरण गरिन् । उनले समतामुलक समाज निर्माणका लागि महिलाको हरेक दृष्टिकोणले सम्मान अपरिहार्य रहेको बताइन् । उनले महिला सशक्तीकरणका लागि तेली कल्याण समाजले उल्लेखनीय भूमिका निर्वाह गर्दै आएको भन्दै प्रशंसा गरिन् ।

कार्यक्रममा तेली कल्याण समाजका अध्यक्ष डा. बालकृष्ण साहले समाजमा पछि परेका महिलाहरुको सशक्तीकरणका लागि तेली कल्याण समाजले विभिन्न कार्यक्रम गर्दै आएको जानकारी गराए । उनले तेली समुदायको उत्थान र एकताको सुत्रमा बाँध्नका लागि जिल्ला कार्य समितिले क्यालेण्डर बनाएर नै वर्षभरि विभिन्न सामाजिक कार्य गर्दै आएको जानकारी गराए ।

तेली कल्याण समाजका जिल्ला सदस्य तथा महिला कार्यक्रमका संयोजक ऋषिराज सेठले शिक्षा, स्वास्थ्य, नापी, इञ्जिनियरिङ्, चिकित्सा, पत्रकारितालगायतका क्षेत्रमा योगदान पुर्‍याएका तेली समुदायका महिलाहरुको नाम छनोट गरेर सम्मान गरिएको बताए ।

अध्यक्ष डा. साहले तेली कल्याण समाजले जानकारीमूलक तथा वर्षभरिको सामाजिक कार्यक्रम गर्ने सूचीसहितको क्यालेण्डर सार्वजनिक गर्न सहयोग पुर्‍याउने समाजका सदस्यहरुलाई धन्यवाद ज्ञापन गरे ।

प्रकाशित : ३० चैत २०८१, शनिबार 16:03