‘रिंकुको सामूहिक बलात्कार र मृत्युमा संलग्नलाई कारवाही हुने’

द नेप्लिज संवाददाता

१८ फागुन २०८१, आइतबार

विराटनगर– गृहमन्त्री रमेश लेखकले सिराहाको नवराजपुर गाउँपालिका–१ भगवतीपुरकी १७ वर्षीया रिंकुकुमारी सदायको सामूहिक बलात्कार पछि शंकास्पद मृत्युको घटनामा प्रहरीले गम्भीर भएर अनुसन्धान गरिरहेकोले दोषीलाई कारवाही हुनेमा विश्वस्त रहन आग्रह गरेका छन् ।

राष्ट्रिय सभामा आइतबार बोल्दै उनले दोषीलाई कडा कारबाही हुने प्रतिबद्धता जनाए । ‘सरकार र म आफ्नो तर्फबाट यस घटनामा संलग्न भएकाहरूलाई क्रियाशीलतापूर्वक खोजतलास गर्ने, अनुसन्धान गर्ने र कानुन बमोजिम कडा कारवाही गर्ने कुरामा पूर्ण प्रतिवद्ध छु र सम्मानित सदनमा पुनः प्रतिवद्धता व्यक्त गर्न चाहन्छु,’ उनले भने । गृहमन्त्री लेखकका अनुसार गत माघ ३० मा रिंकु कुमारी घरमा झुण्डिएको अवस्थामा मृत फेला परेकी थिइन् । यो सम्बन्धमा स्थानीय १९ वर्षीय रुपेश मण्डलको विरुद्धमा आत्महत्या दरुत्साहन शीर्षकमा जाहेरी परेपछि पक्राउ पुर्जी जारी भएको छ ।

फागुन ८ मा मृतकको आमाको तर्फबाट आठ जनाविरुद्ध परेको पूरक जाहेरीमा अपहरण गरेर नियन्त्रणमा लिइ सामूहिक रुपमा जबरजस्ती करणी पछि हत्या गरेको आरोप छ । यो जाहेरीमा पञ्चायत बसेर लेनदेन गरी मिलापत्र गर्न खोजेको अन्तर्गतको कसूर पनि सामेल छ । आठै जनाविरुद्ध पक्राउ पुर्जी जारी भएको छ । पञ्चायतीमा संलग्न तीन जना पक्राउ परिसकेका छन् । पीडकलाई पक्राउ गरेर यथाशीघ्र कारबाहीको दायरामा ल्याउने गरी प्रहरीले काम गरिरहेको पनि गृहमन्त्री लेखकले विश्वास दिलाए ।

गृहमन्त्री लखेकले प्रेम विवाह गरेका सर्लाहीको बरहथवाका नेहा रौनियार र सत्येन्द्र रामको सुरक्षा सरकारले गर्ने प्रतिबद्धता व्यक्त गरे । भेदभावविरुद्धको हक कार्यान्वयन गराउन सरकार क्रियाशील रहेको उनले बताए । साथै उनले विभिन्न विधेयकहरू सदनमा पुगेको भन्दै अन्य नीतिगत र कानुनी सुधार गर्ने विषयमा छलफल भइरहेको जानकारी दिए । भूकम्पपछिको पुनस्र्थापना तथा पुननिर्माणको कामले लय समातेको उनको भनाइ छ । उनले सबैको साथ र सहयोगबाट उपलब्ध स्रोत एवं साधनको परिचालन गर्दै संवेदनशील ढंगले काम गरिरहेको अवगत गराए ।

प्रकाशित : १८ फागुन २०८१, आइतबार 15:57