ट्रम्पद्वारा अमेरिकी नागरिकता बिक्री खुला

द नेप्लिज संवाददाता

विराटनगर– ‘५० लाख डलर दिनुस्, अमेरिकी नागरिकता लिनुस् ।’ राष्ट्रपति डोनाल्ड ट्रम्पले नयाँ भिसा कार्यक्रम ‘ट्रम्प गोल्ड कार्ड’ घोषणा गरेर फेरि चर्चामा छन् । उनी पद सम्हालेदेखि अनौठा निर्णयहरु गरेर विश्वको ध्यान तानिरहेकै छन् ।

यो भिसा पाएपछि नागरिकता पाउने बाटो खुल्ने मात्र होइन, त्यहाँ बसोबास र काम गर्न अनुमतिसमेत पाउँनेछन् । ट्रम्पका अनुसार गोल्ड कार्ड बिक्री दुई साताभित्र सुरु हुनेछ । लाखौँ कार्ड बिक्री हुनसक्ने अनुमान गरिएको छ । उनले यो कार्ड रुसी अर्बपतिहरुलाई पनि बिक्री गर्ने जनाएका छन् ।

‘गोल्ड कार्ड बिक्री गर्दैछौं,’ ट्रम्पले ओभल अफिसबाट भने,‘ ‘तपाईंहरूसँग ग्रिन कार्ड छ, तर यो गोल्ड कार्ड हुनेछ । यसको मूल्य ५० लाख डलर तोक्नेछौँ, जसले ग्रिन कार्डका विशेषाधिकारहरू प्रदान गर्नेछ र नागरिकता पाउने बाटो खोल्नेछ । पैसावालाहरू यो कार्ड किने पछि हाम्रो देशमा आउनेछन् ।’

सीएनएनका अनुसार ट्रम्पले यो कार्यक्रम अन्तर्गत ५० लाख अमेरिकी डलर अर्थात् ७० करोड नेपाली रुपैयाँमा कार्ड खरिद गर्न सकिने जनाएका छन् । विश्वभरका धनाढय नागरिकलाई अमेरिकाले यो गोल्ड कार्ड बिक्री गर्ने भनेको छ ।