भ्रष्टाचार मुद्दामा दोषी ठहर हुँदा पनि प्रदेशसभाले हटाएन वेभ साइटबाट पराजुलीको नाम र तस्बिर

विराटनगर । कोशी प्रदेश सभाका सचिव गोपालप्रसाद पराजुली भ्रष्टाचार मुद्दामा दोषी ठहर भए पनि सचिवालयले प्रदेशसभाको वेभ साइटबाट उनको नाम र तस्बिर हटाएको छैन । भ्रष्टाचार जस्तो गम्भीर प्रकृतिको मुद्दामा दोषी ठहर भएका व्यक्तिको तस्बिर र नाम तत्काल प्रदेशसभा सचिवालयले वेभ साइटबाट हटाउनु पर्ने प्रदेशसभा सांसदहरुको भनाइ छ । 

पशुपतिको जग्गामा बालुवाखानी सञ्चालन गर्दा अनियमितता गरेको मुद्दामा पराजुलीलाई सर्वोच्च अदालतको संयूक्त इजलासबाट बुधबार दोषी ठहर भएको हो । उनी दोषी ठहर भएपछि सभामुख अम्बरबहादुर विष्टले प्रदेशसभाको उपसचिव गौतमराज अमात्यलाई कायममुकायम सचिवको जिम्मेवारी दिएका छन् । तर प्रदेशसभा सचिवालयको वेभ साइटबाट पराजुलीको तस्बिर र नाम हालसम्म हटाएको छैन । 

सभामुख विष्टले कामु सचिवको जिम्मेबारी दिएपछि बिहीबार बसेको प्रदेशसभा बैठकमा अमात्यले सचिवको भूमिका निर्वाह गरेका थिए । प्रदेशसभामा एक्लो उपसचिव रहेकाले सभामुख विष्टले आमात्यलाई कामु सचिको जिम्मेबारी तोकेका हुन् । 

सर्वोच्चका न्यायाधीशद्वय कुमार रेग्मी र अब्दुल अजिज मुसलमानको संयुक्त इजलासले पशुपतिको जग्गामा बालुवाखाली सञ्चालन गर्न दिँदा भ्रष्टाचार गरेको आरोपमा एमाले नेता निर्मल कुइँकेल र पराजुलीसहित ९ जनालाई दोषी ठहर गरेका छन् ।

निजामति सेवाबाट अवकास लिएपछि पराजुली १२ वैशाख २०७६ मा प्रदेश सभाको सचिव नियुक्त भएका थिए । ९ वैशाख २०८१ देखि लागु हुने गरी दोस्रो कार्यकालका लागि प्रदेश सभाको सचिवमा उनी नियुक्त भएका थिए । सर्वोच्चको फैसला पुनरावलोकनका लागि भन्दै पराजुली काठमाडौं पुगेको प्रदेशसभा सचिवालयका कर्मचारीहरु बताउँछन् ।