आज जनआन्दोलन दिवस मनाइँदै

द नेप्लिज संवाददाता

२६ चैत २०८१, मङ्गलबार

काठमाडौँ (रासस) — आज प्रजातन्त्र पुनर्बहाली भएको ३५ औँ वार्षिकोत्सव विविध कार्यक्रमका साथ मनाइँदै छ । २०४६ चैत २६ (सन् १९९० अप्रिल ८) मा ३० वर्षीय पञ्चायती शासन व्यवस्थाको अन्त्य गर्दै बहुदलीय प्रजातान्त्रिक व्यवस्था पुनःस्थापना गरिएको थियो । यही दिनको सम्झनामा हरेक वर्ष चैत २६ मा जनआन्दोलन दिवस मनाउने परम्परा रहिआएको छ ।

२०१७ पुस १ मा राजा महेन्द्रले निर्वाचित सरकारलाई अपदस्थ गरी पञ्चायती व्यवस्था लागू गरेका थिए । त्यसपछि, नेपाली कांग्रेस र संयुक्त वाममोर्चाको नेतृत्वमा २०४६ फागुन ७ (सन् १९९० फेब्रुअरी १८) देखि सुरु भएको जनआन्दोलन ४९ दिनसम्म चलेको थियो । अन्ततः २०४६ चैत २६ (सन् १९९० अप्रिल ८) मा तत्कालीन राजा वीरेन्द्रले बहुदलीय व्यवस्थाको पुनःस्थापनाको घोषणा गरेका थिए ।

यस वर्ष पनि जनआन्दोलन दिवसको अवसरमा काठमाडौँ उपत्यकासहित देशभर विभिन्न कार्यक्रम आयोजना हुँदैछन् । राजनीतिक दलहरू, नागरिक समाज, विद्यार्थी संघसंस्थाहरूले ¥याली, सभा तथा अन्तरक्रिया कार्यक्रमहरू आयोजना गरी प्रजातन्त्र पुनर्बहालीमा योगदान दिने सहिदहरूप्रति श्रद्धाञ्जली अर्पण गर्दैछन् ।

साथै प्रजातान्त्रिक मूल्य र मान्यताप्रति प्रतिबद्धता व्यक्त गर्दै वर्तमान राजनीतिक परिप्रेक्ष्यमा प्रजातन्त्रको सुदृढीकरणका उपायहरूबारे छलफलहरू आयोजना गरिएका छन् । यस अवसरमा, प्रजातन्त्र प्राप्तिका लागि बलिदान दिने सम्पूर्ण सहिदहरूलाई सम्झना गर्दै, लोकतान्त्रिक मूल्यहरूको संरक्षण र संवद्र्धनमा सबै नेपाली एकजुट हुनुपर्नेमा जोड दिइएको छ ।

प्रकाशित : २६ चैत २०८१, मङ्गलबार 07:47