चीनको कडा जवाफ : अमेरिकी आयातमा १२५% सम्म कर, व्यापार युद्ध चर्किंदै

द नेप्लिज संवाददाता

२९ चैत २०८१, शुक्रबार

विराटनगर– अमेरिकी राष्ट्रपति डोनाल्ड ट्रम्पले चीनबाट आयात हुने वस्तुहरूमा १४५ प्रतिशतसम्म ट्यारिफ लगाउने घोषणा गरेपछि, चीनले पनि जवाफस्वरूप अमेरिकी उत्पादनहरूमा १२५ प्रतिशतसम्म ट्यारिफ लगाउने निर्णय गरेको छ । चीनको वाणिज्य मन्त्रालयले नयाँ ट्यारिफ (आयात कर÷सीमा शुल्क) शनिबारदेखि लागू हुने जनाएको छ ।

यसअघि ट्रम्पले चीनमाथि ३४ प्रतिशत अतिरिक्त ट्यारिफ घोषणा गरे पछि चीनले पनि समान अनुपातमा ट्यारिफ लगाएको थियो । त्यसपछि ट्रम्पले थप ५० प्रतिशत ट्यारिफ घोषणा गरे जसको जवाफमा चीनले पनि ५० प्रतिशत थप गर्दै ८४ प्रतिशत पुर्याएको थियो । अब ट्रम्पले कुल १४५ प्रतिशत ट्यारिफ घोषणा गरेपछि, चीनले पनि १२५ प्रतिशत ट्यारिफ लगाउने निर्णय गरेको हो ।

चीनको वाणिज्य मन्त्रालयका प्रवक्ताले भने, ‘अब यो एक मजाक बन्नेछ ।’ उनले अमेरिकाको करले उसको धम्की र दबाबलाई उजागर गरेको बताए । विश्लेषकहरूका अनुसार चीनको यो कदमले अमेरिकी अर्थतन्त्रका विभिन्न पक्षहरूलाई असर पार्नेछ । तर चीनले सबै अमेरिकी सामानमा नभइ निश्चित उत्पादनहरूमा मात्र ट्यारिफ लगाएको छ जसले व्यापार वार्ताको ढोका खुला राख्ने संकेत दिन्छ ।

अहिलेको अवस्थामा चीनले व्यापार युद्धलाई चर्काउनुभन्दा वार्ताको माध्यमबाट समाधान खोज्न चाहेको देखिन्छ । ट्रम्प प्रशासनले भने थप ट्यारिफ लगाउने संकेत दिँदै आएको छ जसले दुई देशबीचको व्यापार सम्बन्धमा थप तनाव सिर्जना गर्न सक्छ ।

प्रकाशित : २९ चैत २०८१, शुक्रबार 17:59