रोहित शर्माले ब्याटले दिए आलोचकलाई जवाफ

‘आलोचकको मुख बन्द, प्रशंसक दङ्ग’

द नेप्लिज संवाददाता

२८ माघ २०८१, सोमबार

विराटनगर- सबै दिन एक समान रहँदैन । समय सबैको आउँछ ।‌ त्यही भएर सोचेर टिकाटिप्पणी गर्नुपर्छ । भारतीय क्रिकेटर रोहित शर्माको ब्याट चले पछि आलोचकहरुको मुख बन्द भएको छ । उनको जोडदार प्रदर्शनले भारतलाई कटकमा खेलिएको दोस्रो एक दिवसीय अन्तराष्ट्रिय म्याचमा इंग्ल्याण्ड विरुद्ध ४ विकेटले जिताएको छ । यो सिरिजमा भारतको विजय पक्का भएको छ ।

उनले दमदार प्रदर्शनको बलमा इंग्ल्याण्डले बनाएको ३ सत ५ रनको लक्ष्यलाई नीकै सहज बनाइ दिए । उनले केही समयदेखि रन बनाउन सकिरहेका थिएनन् । टेस्ट म्याचहरुमा रोहितको प्रदर्शन कमजोर थियो । लगातार दुई टेस्ट सिरिज हारे पछि उनी आलोचकको घेरामा थिए । उनको ठाँउमा कसले भारतीय टिमको कमाण्ड सम्हाल्ने बहस गर्माएको थियो । रोहितले सन्यास लिनुपर्ने सम्मका आवाज उठ्यो। तर उनले दोस्रो एक दिवसीयमा शतकीय पारीले आफूमाथि उठिरहेको सवालको जोडदार जवाफ दिएका छन् । उनको धमाकेदार पुनरागमनले च्याम्पियन्स ट्रफीमा भारतको आशालाई बढाएको छ । विश्वभरका प्रंशसक दङ्ग छन् ।

रोहितले खेलको सुरुआतदेखि छक्का लगाउन सुरु गरेका थिए । जमिसके पछि चौका-छक्काको वर्षा गरेर इंग्ल्याण्डको बलरलाई निरीह बनाइ दिए । रोहितले ९० बलमा १२ चौका र ७ छक्काको मद्दतले १ सय १९ रन बनाए । उनले १ सय ३२ भन्दा माथिको स्ट्राइक रेटले रन बनाउन सफल भए । भारतीय टिमको मुखिया रोहितले १६ महिना पछि शतक बनाएका हुन् । उनले यस अगाडि सन २०२३ मा वनडे विश्वकपको क्रममा ११ अक्टोबरमा अफगानिस्तान विरुद्ध शतक बनाएका थिए ।

उनको करियरको यो दोस्रो सबैभन्दा तीब्र शतक हो । रोहितले ७६ बलमा सय रन पुरा गरे । सन २०२३ को विश्वकपमा अफगानिस्तान विरुद्ध ६३ बलमा आफ्नो करियरमै सबैभन्दा छिटो शतक बनाए । यस पछि उनले १३ खेलमा कुनै शतक बनाउन सकेनन् । रोहित प्लेयर अफ दि म्याच पनि घोषित भए । टिमको लागि रन बनाउँदा मजा लागेको रोहितले बताए। उनी अब अन्तर्राष्ट्रिय क्रिकेटमा भारतको लागि सर्वाधिक शतक बनाउने तेस्रो नम्बरका खेलाडी भएका छन् । उनले करियरको ४९ औं सय बनाउँदै राहुल द्रविडको ४८ शतकको रेकर्ड तोडेका छन् । सचिन तेन्दुलकरले सय शतक र विराट कोहलीले ८१ शतक बनाइसकेका छन् । (भारतीय सञ्चार माध्यमहरुको सहयोगमा)

प्रकाशित : २८ माघ २०८१, सोमबार 13:04