युएई रोजगारीका नाममा ठगी गर्ने सुवास थापा पक्राउ

द नेप्लिज संवाददाता

१३ चैत २०८१, बुधबार

काठमाडौं – वैदेशिक रोजगारीको आकर्षक प्रस्ताव राखी युएई पठाइदिन्छु भन्दै ठगी गर्ने चन्द्रागिरी नगरपालिका–६ निवासी ४१ वर्षीय सुवास थापालाई प्रहरीले पक्राउ गरेको छ ।

थापाले एक पीडितबाट १ लाख २० हजार रुपैयाँ लिई सम्पर्कविहीन भएका थिए । पीडितको उजुरीका आधारमा काठमाडौं उपत्यका अपराध अनुसन्धान कार्यालय, टेकुबाट खटिएको टोलीले उनलाई काठमाडौंको सुकेधाराबाट पक्राउ गरेको हो ।
प्रहरीका अनुसार थापाले आकर्षक तलबको प्रलोभन देखाई वैदेशिक रोजगारीका लागि रकम उठाउने गरेको खुल्न आएको छ । घटनाबारे थप अनुसन्धान भइरहेको छ । पक्राउ परेका थापालाई आवश्यक कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ।

वैदेशिक रोजगारीका नाममा हुने ठगीका घटनामा वृद्धि भइरहेको सन्दर्भमा सचेत रहनु आवश्यक छ । सरकारले यस्ता ठगी नियन्त्रणका लागि थप कडाइ गर्नुपर्ने आवश्यकता देखिएको छ ।

प्रकाशित : १३ चैत २०८१, बुधबार 14:57