रविको बसोबास अब भैरहवा कारागारमा

२५ चैत २०८१, सोमबार

भैरहवा – राष्ट्रिय स्वतन्त्र पार्टीका सभापति एवं गोरखा मिडिया नेटवर्कका पूर्वप्रबन्ध निर्देशक रवि लामिछाने उच्च अदालतको आदेशअनुसार सोमबार बिहान भैरहवा कारागार चलान भएका छन् । उच्च अदालत तुलसीपुर बुटवल इजलासले लामिछानेलाई सहकारी ठगी र संगठित अपराध मुद्दामा थुनामा पठाउने आदेश दिएको थियो ।

लामिछाने कारागार प्रवेश गर्दा उनले अदालतको आदेशप्रति सम्मान जनाउने संक्षिप्त प्रतिक्रिया दिएका छन् । उनले भने, ‘केही छैन, सम्मान छ ।’

रविले सञ्चारकर्मीलाई संक्षिप्त प्रतिक्रिया दिए पनि निकट नेताहरूमार्फत् ४ वटा सन्देश पठाएका छन् । ‘अदालतको आदेशको सम्मान छ । कानुनले दिएको अधिकार प्रयोग गर्छु,’ लामिछानेले सन्देशमा भनेका छन्, ‘तल्लो अदालतको आदेशविरुद्ध माथिल्लो आदालत जाने प्रक्रिया अवलम्बन गर्छु ।’

उनले न्यायको मन्दिरबाट अन्याय नहुनेमा आफू विश्वस्त रहेको बताएका छन् । सँगै अघि भनेका छन्, ‘तर, विभिन्न आशंका उठेका र उठाइएका छन्, ति गलत सावित हुन्छन् ।’ उनले पार्टीलाई एकढिक्का राखेर अभियान निरन्तर बनाउन पार्टीका नेताहरूलाई आग्रह गरेका छन् ।

‘सक्नु हुन्छ बढाउनुस्, नसके पनि नघटाउनुस् । अभियानलाई जनताको बीचमा पुर्याउनुस्,’ उनले नेताहरूलाई भनेका छन् । उनले आफूमाथि राजनीतिक प्रतिशोध भएको भन्दै पालो सबैको आउने बताएका छन् । ‘अहिले ममाथि राजनीतिक प्रतिशोध भयो । पालो सबैको आउँछ,’ लामिछानेले भनेका छन्, ‘यो परीक्षाको पहिलो विद्यार्थी म भएँ । मैले जसरी नै जाँच अरूले पनि दिनुपर्ने छ ।’

भैरहवाका कारागारको ब्लक नम्बर ४ मा रविलाई राखिएको छ । कारागार प्रशासनका अनुसार कारागारका चारवटा ब्लकमध्ये उनलाई चार नम्बर ब्लकमा एक्लै राखिएको हो । कैदीबन्दीको संख्या बढ्ने क्रम जारी रह्यो भने भविष्यमा थप्न सकिने कारागारले जनाएको छ ।

सहकारी ठगी र संगठित अपराधको मुद्दामा गत माघ १३ मा जिल्ला अदालत रुपन्देहीले लामिछानेलाई एक करोड रुपैयाँ धरौटीमा छोड्ने आदेश दिएको थियो । यसपछि जिल्ला सरकारी वकिल कार्यालय र लामिछानेले पुनरावेदनका लागि उच्च अदालत बुटवलमा निवेदन दिएका थिए । उक्त निवेदनमाथि गत शुक्रबार उच्च अदालतले सुनुवाइ गर्दै लामिछानेलाई थुनामा पठाउने आदेश गरेको थियो ।

प्रकाशित : २५ चैत २०८१, सोमबार 16:36