अंग्रेजी अब अमेरिकाको राष्ट्रिय भाषा !

द नेप्लिज संवाददाता

१९ फागुन २०८१, सोमबार

विराटनगर- अंग्रेजीलाई अमेरिकाको आधिकारिक भाषाको मान्यता दिने कार्यकारी आदेशमा राष्ट्रपति डोनाल्ड जे ट्रम्पले शनिबार हस्ताक्षर गरेका छन्। अमेरिकाले पहिलो पटक कुनै एक भाषालाई आधिकारिक भाषाको रुपमा अघि सारेको हो।

यो कार्यकारी आदेशले अब अमेरिकाको केन्द्रीय प्रशासनिक निकायहरूलाई सेवा प्रवाहमा अंग्रेजी बाहेक अन्य भाषामा सेवा उपलब्ध गराउने वा नगराउने बारे छनोटको अधिकार दिएको छ। संघीय अनुदान प्राप्त गर्ने सरकारी एजेन्सी र संगठनहरूले अंग्रेजी बाहेक अन्य भाषामा कागजात तयार पार्ने वा नपार्ने चयनको सुविधा पाएको छ।

अंग्रेजीबाहेक अन्य भाषामा कागजात र सेवा प्रदान गर्न पूर्णतः रोक भने नलगाइएको ह्वाइट हाउसले भनेको छ। ट्रम्पको यो कदमले राष्ट्रिय एकता बलियो बनाउँदै साझा संस्कृतिलाई बढावा पुग्ने राष्ट्रपति कार्यालयले भनेको छ ।

ट्रम्पको यो निर्णयले सन् २००० मा पूर्व राष्ट्रपति बिल क्लिन्टनले गैरअंग्रेजी भाषीहरूलाई भाषा सहायता प्रदान गर्न संघीय एजेन्सीहरू र संघीय अनुदान प्राप्त कर्ताहरूलाई आवश्यक पर्ने कागजात विभिन्न भाषामा तयार पार्नका लागि गरेको व्यवस्थालाई खारेज गरेको छ।

दोस्रो कार्यकालको सुरुवातसँगै आप्रवासीविरुद्व कडा कदम चालिरहेका ट्रम्पले कार्यकालको पाँच हप्तामै अर्को सोचनीय आदेश जारी गरेका छन् । उनको दोस्रो कार्यकालको सुरुवातमै ह्वाइटहाउसको बेवसाइटमा स्पेनिस भाषाका सामग्रीहरू हटाइएनुका साथै भाषा छान्ने विकल्प समेत हटाइएको थियो।

अमेरिकामा यो पाँच दशकमा विभिन्न देशबाट सयौँ भाषा बोल्नेहरू आएर बसेका छन् । सबैभन्दा बढी बोलिने अंग्रेजी सहित अमेरिकामा ३ सय ५० भन्दा बढी भाषा बोलिने गरिएको अमेरिकी जनगणना ब्युरोको तथ्यांकले देखाउँछ।

यहाँ बसोबास गर्नेहरूले स्पेनिस, ई–अपोलेले नाभाजो, युपिक, डकोटा, अपाचे, केरेस, चेरोकी जस्ता भाषाहरू पनि बोल्छन् । पछिल्लो समय चिनियाँ, हिन्दी, उर्दु, भियतनामी लगायतका भाषा बोल्नेहरूको संख्या पनि बढेको छ ।

अमेरिकी नागरिकता तथा आप्रवासन सेवाका अनुसार अमेरिकी नागरिक बन्नका लागि नेचुरलाइजेसनको प्रक्रियामा अंग्रेजीबाट परीक्षा दिनुपर्ने हुन्छ। आदेशमा भनिएको छ, ‘अंग्रेजीलाई देशको आधिकारिक भाषा तोक्नाले नयाँ नागरिकलाई थप सशक्त बनाउनेछ, नयाँ आगन्तुकहरूलाई राष्ट्रिय परम्परामा भाग लिनसमेत सहयोग पुर्याउनेछ।’

अंग्रेजीलाई राष्ट्रिय भाषाको मान्यता दिएसँगै यसले आप्रवासीहरूमा ठूलो प्रभाव पर्ने भएको छ। खासगरी अदालती प्रक्रिया, मतदाता शिक्षा, राज्यद्वारा प्राप्त हुने सेवा सुविधा प्राप्तिको प्रक्रिया लगायतमा यसले असर पार्ने छ । अमेरिकाका ३० राज्यले यस अघि नै अंग्रेजीलाई आधिकारिक भाषा घोषणा गरिसकेका छन्।

हवाई राज्यले मात्र अंग्रेजी सँगै हवाइएन भाषालाई राज्यको आधिकारिक भाषाको रूपमा स्वीकारेको थियो। अंग्रेजी भाषालाई आधिकारिक भाषाको रूपमा लिइए पनि विभिन्न राज्यले त्यहाँका बासिन्दाको उपस्थितिलाई हेरेर संख्यात्मक उपस्थितिमा जोड दिइ उनीहरूले प्रयोग गर्ने भाषालाई समेत कागजातहरूमा समावेश गर्छन् । कतिपय कार्यालयहरूले ट्रान्सलेटर (अनुवादक)को सुविधासमेत दिँदै आएका थिए । अब त्यो सुविधासमेत जरुरी हुने छैन।

इन्टरनेसनल इन्स्टिच्युट फर डेमोक्रेसी एन्ड इलेक्टोरल असिस्टेन्सका अनुसार सरकारी कामकाजका लागि एक वा एकभन्दा बढी आधिकारिक भाषाहरू हुँदा राष्ट्रको चरित्र र त्यहाँ बसोबास गर्नेहरूको सांस्कृतिक पहिचान परिभाषित गर्न मद्दत गर्छ। अंग्रेजी भाषालाई राष्ट्रिय भाषाको मान्यता दिनका लागि यसअघि पनि प्रयास नभएका होइनन्। सन् २०२३ मा अहिलेका उपराष्ट्रपति जेडी भान्स सहितका कंग्रेस सदस्यहरूले अंग्रेजी भाषा एकता ऐन प्रस्तुत गरेका थिए। तर, त्यो सफल हुन सकेको थिएन।

अमेरिकालाई विविधताले भरिएको आप्रवासीहरूको देश भनेर चिनिन्छ। तर, यो आदेशले अमेरिकाको पुरानो परिचयलाई खुम्चयाएको छ । राष्ट्रपति ट्रम्पले अंग्रेजीलाई राष्ट्र भाषा तोक्ने कार्यकारी आदेशमा हस्ताक्षर गरे पनि यसको कार्यान्वयनमा अदालतले के गर्ला भनेर अनुमान गर्न गाह्रो छ। राष्ट्रपति ट्रम्पले गरेका कतिपय कार्यकारी आदेशको कार्यान्वयनमा अदालतले रोक लगाउँदै आएको छ।

प्रकाशित : १९ फागुन २०८१, सोमबार 09:56