आफन्तलाई खबरै छैन, रातारात दाहसंस्कार

द नेप्लिज संवाददाता

२२ फागुन २०८१, बिहीबार

विराटनगर– आफन्तलाई खबर नगरि डेढ साता अघि एक घरेलु श्रमिकको दाहसंस्कार गरिएको घटनालाई शंकास्पद मान्दै प्रहरीले अनुसन्धान थालेको छ । प्रहरीका अनुसार सुनसरीको इटहरी–६, विकास चोकमा ६४ वर्षीय समयलाल गुप्ताले भाडामा लिएको घरमा २१ वर्षीया चन्दा चौधरी काम गर्थिन् ।

गुप्ताका अनुसार उनी अचानक बिरामी परेपछि गत ९ फागुनमा चौधरीलाई सुरुमा इटहरीस्थित पञ्चकोशी हेल्थ सर्भिस र त्यहाँ स्वास्थ्य अवस्था नसुध्रिए पछि थप उपचारका लागि कोशी अस्पताल विराटनगर लगिए पनि चिकित्सकले मृत घोषणा गरेका थिए । अस्पतालबाट शव बुझेर गुप्ताले चौधरीका आफन्तलाई खबर नै नगरी चार जना सहित इटहरीस्थित बुढी खोला घाटमा लगेर दाहसंस्कार गरेका थिए ।

दाहसंस्कारको भोलिपल्ट मात्रै चन्दाकी दिदी रिताले बहिनीबारे खोजबीन गर्दा खबरै नगरी दाहसंस्कार गरिएको थाहा पाए पछि शंका लागेर प्रहरीमा जाहेरी दिएको थिइन् । श्रीमानसँग सम्बन्ध विच्छेद भएपछि चन्दा गुप्ताको घरमा काम गर्न बसेकी परिवारजनले बताएका छन् । गुप्ताले चन्दालाई शारीरिक यातना पनि दिने गरेको आफन्तको आरोप छ । प्रहरीका अनुसार जाहेरीपछि गुप्ता पक्राउ परेका छन् । शव पनि हेर्न नपाएको र पोस्टमार्टम पनि नभएकोले अस्पतालको रिपोर्ट अनुसार अघि बढ्ने प्रहरीले भनेको छ ।

प्रकाशित : २२ फागुन २०८१, बिहीबार 19:13